A primeira canle da Televisión de Galicia retransmite este sábado o encontro Albacete-Deportivo - CSAG
A primeira canle da Televisión de Galicia retransmite este sábado o encontro Albacete-Deportivo
O equipo coruñés defende o liderado da Segunda División a partir das 18:30 h
Na G2, os espectadores poderán ver ese mesmo día o partido entre o Athlétic de Bilbao B e o Lugo, de Primeira Federación, mentres que a plataforma AGalega.gal ofrecerá o domingo o Bergantiños-Oviedo Vetusta e o Sarriana-Fabril, de 2ª RFEF
Santiago, 28.11.2025.- Este sábado, os espectadores da primeira canle da Televisión de Galicia e da plataforma AGalega.gal poderán gozar do mellor fútbol da Segunda División profesional. A partir das 18:00 h comezará unha programación especial coa previa máis completa do partido entre o Albacete e o Deportivo da Coruña, que incluirá unha entrevista a Bebeto, histórico goleador que esta semana regresou á cidade herculina.
O Deportivo ocupa a primeira posición da clasificación empatado a puntos co Rácing de Santander e a Unión Deportiva Las Palmas. A derrota do Almería este mércores en Ceuta deixa os andaluces a un punto do trío da cabeza. Unha temporada máis, esta categoría volve estar moi igualada para pelexar polas dúas prazas de ascenso directo á Primeira División e as catro que permiten disputar a fase final cun único billete para dar o salto á elite.
Patricia Rodríguez Juste encargarase da narración dos 90 minutos de xogo, acompañada nos comentarios polo adestrador Tito Ramallo.
A Primeira Federación, na G2, e a Segunda Federación, en AGalega.gal
Antes do Albacete-Deportivo na TVG, os afeccionados ao fútbol teñen unha primeira cita na G2 a partir das 16:15 h. A cidade deportiva de Lezama acolle o enfrontamento da Primeira Federación entre o filial do Athlétic de Bilbao e o Club Deportivo Lugo. O cadro galego atravesa o mellor momento do curso e, tras derrotar o Pontevedra no derbi do Anxo Carro, colocouse xa a tres puntos da zona de promoción de ascenso.
O multifútbol chegará á plataforma AGalega.gal na tarde do domingo. Desde as 17:00 h, as cámaras recollerán dous puntos de directo coa disputa dunha nova xornada do grupo primeiro da Segunda Federación. Nas Eiroas, o Bergantiños de Carballo recibe o Oviedo Vetusta e na Ribela haberá derbi galego entre a Sarriana e o Fabril Deportivo.
‘En Xogo’, na noite do domingo
Ao remate da xornada, a primeira canle da TVG ofrece o domingo pola noite o resumo dos principais partidos con presenza galega. Arredor da medianoite e durante 60 minutos de emisión, os seareiros terán no programa ‘En Xogo’ a información máis completa dos encontros Celta-Español e Albacete-Deportivo, xunto a todos os goles que se produciron nas competicións dependentes da Federación onde compiten os clubs galegos.