As presentadoras Rocío Delgado e Rocío Durán acompañarán a Xosé Ramón Gayoso nas badaladas de Fin de Ano da TVG - CRTVG
As presentadoras Rocío Delgado e Rocío Durán acompañarán a Xosé Ramón Gayoso nas badaladas de Fin de Ano da TVG
Os tres tomarán as uvas cos galegos desde a praza do Obradoiro, en Santiago de Compostela
Santiago, 04.12.2024.- As presentadoras Rocío Delgado e Rocío Durán, actualmente á fronte dos magazines ‘O Termómetro’ e ‘Hora Galega’ respectivamente, acompañarán a Xosé Ramón Gayoso na emisión das badaladas de Fin de Ano da Televisión de Galicia.
Estas tres caras tan coñecidas para os espectadores serán as encargadas de tomar as uvas cos galegos e galegas, na conta atrás para recibir por todo o alto o 2025, desde a praza do Obradoiro, coa que se conectará durante o transcurso da ‘Gala de Fin de Ano’.
Gayoso é un auténtico experto nestas lides, e Rocío Durán, que triunfa na pantalla coa emisión do programa ‘Hora Galega’ nas tardes da TVG, xa acompañou os espectadores na Noitevella do ano pasado. A debutante neste caso é Rocío Delgado, xornalista viguesa que conduce desde o pasado mes de setembro o magazine matinal ‘O Termómetro’ na Televisión de Galicia.