Chega este domingo á Televisión de Galicia 'Pesca Total', un 'reality' en que seis aspirantes sen experiencia no mar se enrolarán nun barco pesqueiro

Santiago, 06.10.2024.-   Esta noite comeza o primeiro reality de mariñeiros da Televisión de Galicia. A canle pública estrea ‘Pesca Total’ (22:50 h), un programa presentado por Lucía Regueiro en que seis aspirantes sen experiencia previa no mar se enrolarán no barco Playa de Sanxenxo. Ás ordes do capitán Sauro Martínez e coa axuda da súa tripulación, os participantes enfrontaranse a desafíos e tarefas propias dun barco pesqueiro.

Ao longo de varias xornadas de pesca real, deberán demostrar que poden ser considerados auténticos mariñeiros e mariñeiras, e competirán por ver quen é o gañador do gran premio de 7.500 euros de ‘Pesca Total’.

No primeiro programa, os espectadores coñecerán a Mirian, Dani, Natalia, Suso, Tino e Elena, os seis aspirantes de ‘Pesca Total’ sen coñecementos previos sobre o oficio de mariñeiro. No seu bautismo de mar, irán subindo por quendas á embarcación para poñerse aos mandos do capitán Sauro Martínez.

Nesta primeira toma de contacto navegarán, como será habitual en toda a temporada, pola ría de Pontevedra, coñecendo as nocións básicas de seguridade, mantemento e traballo coa rede. Será unha xornada dura, pero nada comparable ao que virá despois. Serán quen de aguantar o primeiro día estes seis aventureiros ou sufrirán xa os primeiros mareos?