Nunha nova entrega de 'Saudade de ti', Pedro suxire hoxe aproveitar a amnesia de Isidro para gañar apoio público - CRTVG
Nunha nova entrega de 'Saudade de ti', Pedro suxire hoxe aproveitar a amnesia de Isidro para gañar apoio público
Ademais, espértase en Lucho o interese por ter fillos con Elba e Brais rexeita manter a súa amizade con Noa para evitar complicacións sentimentais
![](/documents/2915657/0/Cap_136+%289%29_Rec.jpg/6801e104-d9d6-9f6a-f66d-3459866288bc?t=1721034721183)
Santiago, 16.07.2024.- No capítulo deste martes da serie ‘Saudade de ti’ (22:50 h), Celia regresa á casa preocupada pola amnesia de Isidro. Pedro suxire aproveitar esta situación para gañar apoio público, pero a doutora Eiroa rexeita esta proposta porque non quere tirar proveito da doenza de seu pai.
Pola súa parte, Teresa ofrécelle axuda a Raúl coa nena e sorprende a todos ao deixar que sexa Lucho quen coide do bebé. Despois de atender a Carmen, Lucho amosa o seu interese por ter fillos con Elba, pero ela séntese incomoda ante a idea de formar unha familia e suxire aprazar a voda debido ao estado do seu tío Isidro.
Namentres, Brais rexeita manter a súa amizade con Noa para evitar complicacións sentimentais, pero a ela o que lle preocupa é a relación de Álex con Eloi, o capataz da obra.