CSAG Viva

Santiago, 23.01.2026.-    Os espectadores da segunda canle da Televisión de Galicia teñen este sábado sesión continua de deporte. A partir das 16:15 h, o fútbol será o protagonista co derbi galego na Malata entre o Rácing de Ferrol e o Arenteiro. 

O equipo departamental chega a este encontro coa necesidade de reencontrarse coa vitoria tras a goleada encaixada ante a Ponferradina por 3-0. Mentres, o cadro do Carballiño experimentou unha lixeira mellora ao empatar en Pasarón fronte a Pontevedra a un gol.

Ao remate do fútbol chegará o balonmán europeo desde o Palazzetto dello Sport Pino Cardella de Sicilia, co desenlace da eliminatoria de oitavos de final da European Cup entre o Erice e o Guardés. O conxunto galego defende a renda de tres goles obtida a semana pasada na Sangriña, tras gañar por 25-22.

Tamén o sábado, a plataforma AGalega.gal reserva dúas horas para o deporte, coa emisión ás 17:00 h do partido da Segunda RFEF entre o Fabril Deportivo e o Sámano desde o campo Arsenio Iglesias de Abegondo. O domingo, tamén ás 17:00 h, será a quenda nas Eiroas para outro encontro desta categoría, co enfrontamento entre o Bergantiños de Carballo e o Marino de Luanco.

‘En Xogo’

O domingo, ás 22:25 h pola G2 e en diferido ás 00:30 h pola primeira canle da TVG, os afeccionados ao fútbol teñen unha cita co histórico programa ‘En Xogo’, conducido por Gustavo Varela. Esta xornada a atención estará posta no Real Sociedade-Celta, da Primeira División, e no Deportivo da Coruña-Rácing de Santander, da Segunda. 
    
O Celta viaxa a Anoeta tras garantir a súa presenza na eliminatoria intermedia da Europa League e aínda con opcións matemáticas de entrar directamente nos oitavos de final. Antes de viaxar a Belgrado para visitar o Estrella Roja, o equipo de Claudio pasa por San Sebastián para medirse a un rival que vai a máis co cambio de adestrador e que foi quen de derrotar ao Barcelona a pasada semana.                                      

Para o Deportivo, a visita do Rácing de Santander a Riazor soa a final anticipada polo ascenso á Primeira División, xa que o equipo cántabro é o líder sólido da categoría, cunha vantaxe de catro puntos respecto aos coruñeses.

Ademais do fútbol profesional, os espectadores da TVG e da G2 poden ver todos os goles dos equipos galegos nas categorías da RFEF e na Primeira División feminina.

Deportes nos Telexornais

Os informativos ‘Bos Días’, ‘Telexornal Mediodía’ e ‘Telexornal Serán’ reservan na fin de semana amplos espazos para a información deportiva. Ademais de todo o que aconteza nas ligas de fútbol, tamén será noticia o Breogán-Real Madrid, da Liga ACB de baloncesto, xunto á semifinal da Copa Federación entre o Ourense e o Estudiantes. Na competición feminina destacan o Estepona-Baxi Ferrol e o Ensino-Joventut.

Redes sociais

As contas de X e Instagram de ‘En Xogo’ e a web G24.gal informan e entreteñen sobre os equipos e deportistas galegos de alta competición durante toda a fin de semana. Nos últimos días, a saída de Dro ao París Saint Germain e a celebración das peñas do Deportivo tras a vitoria en Almería foron tendencia nas redes sociais. 

Santiago, 23.01.2026.-    Os medios públicos galegos celebran o 140 aniversario do nacemento de Alfonso Daniel Rodríguez Castelao coa programación especial de ‘Universo Castelao’, unha ampla selección de contidos desde o domingo na G2 e na plataforma dixital AGalega.gal, que achegarán unha visión plural e accesible de Castelao como creador, pensador, político e símbolo colectivo.

E a primeira canle, a TVG, estreará o domingo 1 de febreiro no prime time ‘Antes de nós’, cinta dirixida por Ángeles Huerta que quedará dispoñible na plataforma dixital os dous días seguintes. O filme, protagonizado por Xoán Fórneas e Cris Iglesias, aborda momentos decisivos na vida de Castelao nun relato íntimo sobre a dor, a creación e o compromiso compartido. Ademais, o 29 de xaneiro, a G2 emitirá o making off da película, ‘Antes de nós, o Castelao máis íntimo’.
    
Pero durante toda a semana a G2 (desde as 22:30 h) ofrecerá unha ampla escolma de documentais e pezas relativas a Castelao. Algúns deles son, xa este domingo 25 de xaneiro, ‘Filmando a Castelao’, unha retrospectiva sobre o filme ‘Castelao: Biografía dun Ilustre Galego’, promovido polo Centro Galego de Bos Aires nos anos 70, e ‘1986, centenario do nacemento de Castelao’, unha peza en que Persoeiros da vida política e cultural da época comentan aspectos da súa obra e personalidade . O luns emitiranse ‘Os señores da palabra: Castelao, Letras Galegas 1964’, ‘As mil e unha páxinas: Castelao e a literatura galega da diáspora’, ‘A trabe de ouro: O teatro galego’ e a aproximación á Xeración Nós ‘Nós, semente de futuro’.

 Outros contidos da semana serán, entre outros, ‘Un mundo de historias: O retrato’ (día 27), unha dramatización deste relato de Castelao; ‘Historias a pé de páxina: o nacemento da Rianxeira’, historia do himno oficioso de Galicia (día 28), e ‘No bico un cantar: Lela’, sobre a canción baseada no texto de ‘Os vellos non deben namorarse’; tamén o 28 de xaneiro, ‘Virxinia Pereira, a community manager de Castelao’ (día 29), peza que se achega á figura da muller de Castelao, sepultada baixo a enorme sombra do rianxeiro máis universal; ou, xa o domingo 1 de febrero, o documental ‘Xeración Nós’. 

Sección especial en AGalega.gal
    
Todos os contidos emitidos na G2 quedarán recollidos na plataforma AGalega.gal, que ampliará a oferta con máis pezas para revisitar a figura, a obra e o legado dun dos grandes referentes da cultura galega contemporánea, nado un 29 de xaneiro. Así, ‘Universo Castelao’ complétase con, entre outros títulos, tres faladoiros históricos: ‘A Chave: Castelao na luz e na sombra’, ‘A Chave: Castelao na emigración’ e ‘Encontros: Castelao’.

Con esta programación especial, a CSAG reforza o seu papel como plataforma de referencia para a divulgación do patrimonio cultural galego, ofrecéndolle ao público unha proposta ampla, rigorosa e accesible que convida a redescubrir a vixencia de Castelao desde múltiples olladas e xeracións.

Santiago, 23.01.2026.-    O venres comeza a fin de semana de retransmisións deportivas na Radio Galega e AGalegaAudio.gal cos partidos adiantados da Primeira RFEF. O Celta Fortuna, segundo clasificado, recibe en Balaídos o Zamora, sexto na táboa. O Pontevedra, que é o terceiro do campionato, visita o Mérida no estadio Romano. Roberto Carlos Carballo conducirá a primeira entrega de ‘Galicia en Goles’ desde as 20:30 h ata as 00:00 h.

O sábado, a partir das 14:15 h, o baloncesto será o principal protagonista, co Breogán-Real Madrid da Liga ACB desde o Pazo de Lugo. Con este encontro rematará a primeira volta do curso, en que o equipo que prepara Luis Casimiro sumou sete triunfos e ten un colchón de catro respecto á zona de descenso. Pola súa parte, o Real Madrid amosouse irregular e así e todo ocupa o liderado da clasificación, con catorce vitorias e dúas derrotas. O programa tamén seguirá a semifinal da Copa da Federación Española de Baloncesto, que disputan en Palencia o Ourense e o Estudiantes.  

No fútbol destaca o derbi da Primeira RFEF na Malata entre o Rácing de Ferrol e o Arenteiro. A situación do cadro departamental comeza a ser preocupante, porque, malia o cambio de adestrador, o equipo segue perdendo posicións e xa está fóra da zona de promoción de ascenso. Pola sua parte, o conxunto do Carballiño foi quen de puntuar en Pasarón e continúa na pelexa por evitar o descenso de categoría. Na Segunda RFEF, o Fabril parte como favorito desde a segunda praza ante o feble Sámano, que é o pechacancelas. Mentres, o Coruxo ascendeu á sexta praza na pasada xornada e nesta visita o filial do Real Oviedo, líder do grupo.                                      

Xa o domingo, a edición matinal principiará ás 12:00 h coa cobertura do Valladolid Promesas-U. D. Ourense, de Segunda RFEF. Os das Burgas están xa asentados na categoría e tras os últimos resultados accederon á zona de promoción, ocupando a quinta posición. Na Terceira destaca o Silva-Arousa na xornada matinal. Completa a axenda o Ensino Lugo-Joventut da Liga feminina de baloncesto. 

A partir das 14:15 h, a atención estará posta na sesión continua dos grandes do fútbol galego. O Celta de Vigo, tras a vitoria europea do xoves ante o Lille, visita Anoeta para enfrontarse á Real Sociedade, que acaba de derrotar o Barça. 

Pola noite, Riazor será o punto de directo co partido da Segunda División entre o líder, o Rácing de Santander, e o cuarto clasificado, o Deportivo. Os dous gañaron na pasada xornada a dous rivais directos polo ascenso. Mentres o equipo coruñés sumaba tres puntos no Mediterráneo ante o Almería, os cántabros goleaban no Sardinero a Unión Deportiva Las Palmas.

Durante a tarde haberá conexións co Avilés-Lugo, de Primeira RFEF, xunto á xornada de Segunda e Terceira RFEF. Outra das citas destacadas é o Logroño-Deportivo da Primeira División feminina.

Santiago, 23.01.2026.-    O 22 de xaneiro de 2025 falecía un dos rostros históricos e máis queridos para os espectadores da Televisión de Galicia: Xosé Manuel Piñeiro. Cumprido xa un ano do seu pasamento, ‘Luar’ segue tendo moi presente o emblemático comunicador e por iso dedica o programa deste venres a lembrar a súa figura.

O espazo da TVG contará coa presenza no estudio da súa familia, a súa nai, as súas irmás e as súas sobriñas. Tamén participarán na homenaxe moitos/as compañeiros/as e amigos/as que traballaron con el durante os seus máis de 30 anos de carreira no mundo audiovisual, como Gloria Ferreiro, Sonia López, Marcos Pereiro, Isi, Tamara Pérez, Alba Lago, David Amor, Sergio Pazos e Roberto Vilar, entre outros.

No apartado musical, a primeira en pisar o escenario será outra das grandes amigas de Piñeiro, a artista portuguesa María do Ceo, unha excelente fadista e unha voz privilexiada que conseguiu que este xénero musical forme parte da cultura de Galicia.  Tamén contribuirá a esta homenaxe Pili Pampín, que o lembrará a través da súa música.

Outra das artistas convidadas do programa desta semana é a cantante estremeña de pop-dance Soraya, cuxa voz é unha das máis recoñecidas do panorama musical español desde que participou na cuarta edición de ‘Operación Triunfo’. Atesoura 20 anos de carreira, en que publicou varios traballos, ademais de numerosos sinxelos de grande éxito. No programa de hoxe interpretará os seus últimos lanzamentos, temas moi discotequeiros, perfectos para lanzarse á pista a bailar.

Completan o cartel musical deste venres as actuacións da orquestra Nueva Fuerza, da Asociación Cultural Folclórica O Fiadeiro e do músico, actor e presentador Paco Lodeiro, que cantará ‘O amor está en Galicia’, título do novo programa que presentará a partir da semana que vén na TVG.

Ademais, no programa de hoxe toca final de fase en ‘Recantos’, coa expulsión de catro concursantes. Antes de que o xurado tome a decisión de cales son os ‘recanteiros’ que deben abandonar o concurso, subirán ao escenario Rocío Souto, procedente de Lugo Centro, e Parawy, representante da comarca Terras do Eume.

Santiago, 18.1.2026.-   A produción galega e a ficción internacional protagonizan as novas estreas de AGalega.gal esta semana, cun especial protagonismo para o documental galego ‘Á destra e á sinistra’, a miniserie británica da BBC ‘Efémeras’ e a webserie de humor ‘Peter Brandon’, creada e protagonizada por Pedro Brandariz. Estas incorporacións amplían a oferta de ficción, cinema e documental da plataforma, que continúa ofrecendo á audiencia todo o contido da grella da TVG.

Entre estas estreas cómpre salientar o documental galego ‘Á destra e á sinistra’ (mércores 21), que afonda na correspondencia entre Camilo José Cela e Rafael Alberti. A través deste diálogo epistolar entre dous escritores ideoloxicamente afastados, a obra ofrece unha reflexión sobre o contexto literario e social da época e rende homenaxe á literatura como espazo de encontro máis alá das diferenzas.

Outra das propostas recomendadas é a miniserie británica ‘Efémeras’ (venres 23), unha especie de carta de amor ás amizades masculinas e ao que estas significan, realizada pola BBC. Esta produción de dous capítulos, que aborda con sensibilidade e intensidade os límites da amizade, relata a historia real do novelista Andrew O’Hagan, que escribiu o libro homónimo (‘Mayflies’) despois de que seu amigo da infancia morrera aos 51 anos. Os protagonistas desta serie dramática, Tully e Jimmy, amigos de toda a vida, enfróntanse á súa proba máis dura cando Tully, enfermo terminal, decide poñer fin á súa vida en Suíza coa axuda do seu amigo. A situación complícase cando a muller de Tully descobre os seus plans e se opón firmemente á decisión.

A primeira novidade da semana chega o luns 19 coa estrea da webserie ‘Peter Brandon’, de Pedro Brandariz. Nela, o cómico galego, a piques de facer 40 anos, atravesa unha crise persoal e profesional marcada pola falta de ilusión e pola necesidade de conectar cun público máis novo. Co obxectivo de reinventarse, decide crear un novo alter ego, Peter Brandon, co que aspira a redefinir o seu humor e deixar unha nova pegada artística. 

A plataforma AGalega.gal suma, amais, novos títulos do cinema internacional. O martes 20 incorporarase o filme ‘O legado’, un drama ambientado na baía de Arcachón, en que un recoñecido ostricultor sofre un intento de asasinato que o deixa gravemente ferido. As súas tres fillas reúnense ao seu carón nun momento en que o futuro da granxa familiar, L’Héritage, queda no aire. A longametraxe estará dispoñible durante 30 días.

O xoves 22 será a quenda do thriller ‘Conspiración’, protagonizado por Jerry Fletcher, un taxista neoiorquino obsesionado coas teorías conspirativas que parecen condenalo a vivir nun mundo de fantasía. Porén, unha serie de acontecementos inesperados comezan a darlle a razón e, xunto a Alice, unha axudante do fiscal, verase envolto nunha perigosa trama que cuestiona todo o que parecía absurdo. O filme estará dispoñible durante 7 días.

E finalmente, o sábado 24 estrearase o filme ‘Pais e nais’, unha comedia dramática danesa protagonizada por Ulrik e Piv, unha parella que intenta integrarse no grupo de familias da nova escola da súa filla. O que comeza como un intento por encaixar convértese nun retrato incómodo e irónico das dinámicas sociais contemporáneas, cheas de egos, hipocrisía e inseguridades. A película estará dispoñible durante 30 días.

Con estas estreas, AGalega.gal reforza a súa programación semanal cunha oferta diversa e de calidade, sen deixar de ofrecer á audiencia todo o contido habitual da grella da TVG. 
 

Santiago, 12.01.2026.- Os clásicos do rock e do pop coas historias que hai detrás das cancións chegan a Radio Galega Música os venres ás 22:00 h. Da man de Ricardo Alonso, cada semana, o programa ‘Saúde e Rock and Roll’ levaranos de viaxe pola historia dos grandes himnos do rock a través das anécdotas e curiosidades que hai detrás dos clásicos da música rock e pop e que seguen marcando xeracións.

O espazo é xa accesible na plataforma dixital e agora tamén en Radio Galega Música os venres ás 22:00 h.

AGalegaAudio.gal é a plataforma de referencia da radio en galego en que se atopa toda a programación da Radio Galega, así como un amplo abano de podcasts, videopodcasts e contidos nativos exclusivos de humor, cine, historia, ficción, cultura, deporte, música, etc. A plataforma é gratuíta e está á disposición da audiencia desde calquera parte do planeta. Pódese descargar desde Google Play, Apple Store, Chromecast e nas principais televisións intelixentes (dispoñible para descargar en versión iOS e Android).

Santiago, 9.1.2026.-  A sobremesa da TVG estrea este luns unha nova temporada de ‘Atrápame se podes’, un dos concursos máis recoñecibles da canle, que regresa cun formato dinámico, cheo de ritmo e coa complicidade dun presentador moi querido pola audiencia galega, Rodrigo Vázquez.

De luns a venres, arredor das 15:40 horas, o comunicador ourensán ponse de novo á fronte deste concurso de cultura xeral, en que cinco concursantes compiten en roldas eliminatorias polo cobizado bote, que nesta nova etapa parte de 10.000 euros. Axilidade mental, rapidez e estratexia son as claves dun formato que mantén a súa mecánica clásica e que combina preguntas individuais e en parella para poñer a proba os coñecementos dos participantes.

En ‘Atrápame se podes’ os cinco concursantes rivalizan semanalmente nun formato composto por cinco fases. As eliminacións comezan a partir da segunda rolda e, en cada programa, só un deles logrará chegar á proba definitiva, o ‘minuto final’. Nela deberá responder correctamente cinco preguntas para optar ao bote, que irá aumentando programa a programa ata que alguén consiga gañalo. Como principal novidade, o concurso premiará con 100 euros cada resposta correcta na fase do ‘minuto final’, aínda que non se complete o reto completo. 

Durante as primeiras emisións desta nova etapa, Rodrigo Vázquez animará tamén a audiencia a participar no programa, abrindo o proceso de cásting para novos concursantes. As persoas interesadas poden inscribirse enviando unha mensaxe de WhatsApp ao número 618 388 087 cos seus datos de contacto.

Preto de cumprir as 1.000 emisións na súa anterior etapa na TVG, ‘Atrápame se podes’ entregou o maior premio da historia da canle pública galega, 101.800 euros, que acadou o coruñés Iván Pantín. 

Santiago, 05.01.2026.-  A Corporación de Servizos Audiovisuais de Galicia (CSAG) realiza este luns unha despregadura especial con motivo da xornada das Cabalgatas de Reis, unha das citas máis significativas do calendario festivo en Galicia, especialmente para o público infantil e familiar.

Os Telexornais do mediodía e da noite emítense hoxe en directo desde un dos puntos máis céntricos da Coruña, no Parrote, fronte á Porta Real, como parte da aposta da CSAG por levar os informativos á rúa e achegar a información á cidadanía nos grandes eventos de interese social que se viven en vilas e cidades de toda Galicia.

O ‘Telexornal mediodía’ foi presentado por Carlos Amado, mentres que o ‘Telexornal serán’ correrá a cargo de Pablo Muñoz. Emítense desde un estudio móbil de última xeración, concibido para facilitar a mobilidade dos informativos e a súa realización desde diferentes puntos do territorio galego, reforzando un modelo de medios públicos próximos, dinámicos e en contacto directo coa realidade social.

A despregadura complétase coa emisión, desde o mesmo emprazamento, do programa ‘A tarde’ da Radio Galega, presentado por Antón Rebollido, con contidos especiais vinculados ás celebracións de Reis que se desenvolven en toda Galicia. Está prevista a participación de convidados relacionados coa seguridade, a cultura, a creación artística e o ámbito infantil, así como actuacións musicais e espazos divulgativos, nunha proposta pensada para todos os públicos.  

No que vai de tempada, desde o pasado mes de setembro, a TVG levou os seus telexornais a distintos puntos do territorio galego, con emisións especiais desde Lugo, A Toxa, Ourense e Tui, coincidindo con acontecementos informativos, culturais e sociais de especial relevancia.

Santiago, 24.12.2025.-     A Televisión de Galicia prepárase para vivir unha noite máxica de Fin de Ano cunhas badaladas moi especiais. Eva Iglesias, Aitana del Mar, Arturo Fernández e Eddy Insua serán os encargados de acompañar todos os galegos na chegada de 2026, tomando as uvas en directo desde a emblemática praza do Obradoiro, en Santiago de Compostela.

Os catro presentadores, caras moi familiares da canle pública, chegan a esta cita tras conquistar os fogares galegos a través de programas tan queridos como ‘Luar’, ‘Land Rober +Show’, ‘Sala G’ ou o máis novo en chegar, ‘Pulso activo’. A súa proximidade e carisma serán os ingredientes perfectos para recibir o novo ano por todo o alto.

Un pouco antes da medianoite do 31 de decembro, Xosé Ramón Gayoso daralles paso desde o estudio da ‘Gala de Fin de Ano’ da canle, para retomar xusto despois o especial de música e festa que a TVG programa para a última noite do ano. 

Santiago, 19.12.2025.-    O presentador galego Rodrigo Vázquez regresa polo Nadal á súa casa, á Television de Galicia, na que se deu a coñecer e desenvolveu boa parte da súa carreira. Vázquez volve á Galega para presentar os especiais de Nadal de ‘Atrápame se podes’.

Desde o luns 22 de decembro, Rodrigo Vázquez  presentará de luns a venres (15:45 h), xusto antes do ‘Quen Anda Aí?’, unha edición solidaria de ‘Atrápame se podes’, en que personaxes famosos concursarán e doarán os premios a causas solidarias. Entre eles, estarán presentadores, actores e humoristas, todos rostros ben coñecidos para os espectadores da TVG. Na semana de Reis Magos os protagonistas serán nenos e nenas, nunha edición moi especial do concurso, pensada para a audiencia máis familiar.

O formato contará con cinco roldas eliminatorias con preguntas de cultura xeral e o premio dedicarase cada día a unha organización social diferente. Cada xornada poranse en xogo 1.500 euros, que se poden entregar íntegros ou acumularse parcialmente, de xeito que o bote pode ir crecendo cada día. No caso da edición infantil, os premios non serán en metálico, senón en forma de agasallos para os participantes.

Santiago, 19.12.2025.-  A retransmisión do sorteo da Lotaría de Nadal, o luns 22, dará comezo á programación especial de Nadal da Televisión de Galicia. Ás 08:30 h, e con Pablo Muñoz e Nuria Castro como presentadores, comezará un especial con ampla cobertura por toda Galicia na busca de posibles afortunados e puntos de directo no salón de lotarías en Madrid.

         Ese mesmo luns chega á pantalla a gran novidade do Nadal. Rodrigo Vázquez volve á TVG e ponse á fronte dun dos concursos máis agardados da Galega, ‘Atrápame se podes’, nunhas edicións especiais de Nadal. O concurso terá como protagonistas caras coñecidas da canle, durante as semanas de Nadal e Fin de Ano, e contará cos máis pequenos da casa durante a semana de Reis.

         Na Noiteboa, os espectadores da TVG pasarán a velada con ‘A Gran Cea’. María Mera e César Romero serán os anfitrións da noite, en que participarán os concursantes, os padriños e o xurado de ‘A Liga dos Cantantes Extraordinarios’.

         Na tarde do 25 de decembro, máis entretemento da man do espazo ‘Nadal Challenge’, no que se buscará a casa coa mellor decoración das catro provincias galegas. Media ducia de vivendas competirán por recibir o premio do programa presentado por Cristina Andrade: un cheque de 1.000 euros. E pola noite comezará un experimento musical único: ‘Sala G. O mellor dúo da historia’, un espectáculo presentado por Arturo Fernández en que os grandes nomes da música compartirán escenario co talento galego actual. Serán tres programas especiais, o 25, o día de Aninovo e o 8 de xaneiro, con dúas semifinais e unha gran final e coa participación de seis parellas musicais en cada unha delas.

         Para despedir 2025, a música dos 90 será protagonista na ‘Gala de Fin de Ano’ presentada por Xosé Ramón Gayoso e Aitana del Mar. Contará coa actuación de artistas destacados desa década como Marta Sánchez, Azúcar Moreno, Los Limones, OBK, Rebeca, La Década Prodigiosa e Los Manolos. Boris Izaguirre e Lalo Penelas, o ‘chapuzas’ do ‘Luar’, terán unha presenza destacada no programa. Esa noite, en directo e desde a praza do Obradoiro, a TVG retransmitirá as 12 badaladas coas que se lle dará a benvida ao 2026, da man de Eva Iglesias con outros tres acompañantes que se anunciarán nestes días.

         Para o serán do 1 de xaneiro, resérvase o especial ‘Nada é para sempre’, que recompilará as actuacións musicais máis emblemáticas e curiosas dos 40 anos de historia da TVG. Coa narración de Kiko Novoa, a voz das mañás da Radio Galega, os espectadores verán artistas internacionais, nacionais e galegos, e escoitarán os temas máis coñecidos dos cantantes e grupos que máis triunfaron.

         Na tarde do 5 de xaneiro, chegará a tradicional retransmisión da cabalgata de Reis, nesta ocasión desde as rúas da Coruña, nun programa que conectará tamén con outras cidades e vilas galegas. Esa noite e ao día seguinte, 6 de xaneiro, emitiranse no prime time senllas edicións especiais do reality show de baile ‘Bailamos Celebrity’, cos famosos dándoo todo na pista de baile e nunha festa en que só pode gañar unha parella.

Directos, música, humor, tradición, ilusión e solidariedade, na Radio Galega

         A Radio Galega tamén prepara unha programación especial para acompañar a audiencia este Nadal, con directos, música, humor, tradición e moita ilusión. Como no caso da TVG, as propostas para estas datas comezarán co sorteo da Lotaría e incluirán un especial de ‘Fondos Reservados’ para a Noiteboa e outro titulado ‘Saúde e rock and roll’ para o día de Nadal, que permitirá lembrar e reivindicar o espírito natalicio dos grandes roqueiros de sempre.

         Ademais, ‘Seres’, o programa da medianoite da Radio Galega, presentado por Rubén Riós, emitirá o día 24 unha edición especial realizada no comedor social da asociación Vida Digna, en Vigo, cun obxectivo claro: poñer o foco na compaña, na escoita e na dignidade, nunha noite en que ninguén debería sentirse só nin soa.

         O 30 de decembro, a ficción sonora volverá ocupar un lugar destacado coa recuperación do radioteatro en ‘Galicia por Diante’. Xa o mércores 31, a RG despedirá o ano coa retransmisión en directo das badaladas desde o Obradoiro. Finalmente, o luns 5 de xaneiro, a emisora acompañará ás Súas Maxestades de Oriente na Cabalgata de Reis da Coruña.

Máis contidos para a cativada en Xabarin.gal

         A plataforma dixital prepara estreas para este Nadal, con contidos de animación para toda a familia. A proposta especial arranca este venres coa estrea da serie ‘Os Bolechas cantan ao Nadal’, á que seguirán unha edición de Nadal das ‘Aventuras de Paddington’, ‘Betty Atómica’, ‘O abominable meniño das neves’ e ‘O neno e a besta’. A última semana do ano estará dedicada a Wallace e Gromit, cunha selección das súas curtametraxes máis emblemáticas e premiadas.

Santiago, 18.12.2025.-    Este Nadal, Xabarín.gal convértese no espazo de referencia para o entretemento familiar en galego cunha programación especial cargada de novidades pensadas para todas as idades. Xunto ás estreas destas datas, a plataforma infantil e xuvenil da CSAG lembra que toda a familia pode seguir gozando en galego de series moi populares, como ‘A patrulla canina’, ‘As aventuras de Paddington’, ‘Ladybug’, ‘As Tartarugas Ninja’, ‘Sonic Boom’, ‘Shin Chan’ ou ‘Doraemon’, dispoñibles de maneira continuada.

A programación especial arranca este venres coa estrea da serie ‘Os Bolechas cantan ao Nadal’, unha viaxe musical polas tradicións galegas destas festas. Braulio percorre diferentes puntos da xeografía para descubrir cantares de Reis e costumes populares que se manteñen vivos grazas ao labor de asociacións culturais e agrupacións musicais. Ese mesmo día ampliarase tamén a sección de músicas do Xabarín cun novo espazo dedicado ás ‘Cancións dos Bolechas cantan ao Nadal’.

O luns 22 de decembro chegará a Xabarin.gal un especial de Nadal das ‘Aventuras de Paddington’, acompañado da creación dunha sección especial de Nadal con contidos temáticos para gozar durante todas as festas. Ao día seguinte, o martes 23, estrearase a serie ‘Betty Atómica’, protagonizada por Betty, unha nena de dez anos que combina a súa vida cotiá cos deberes dunha heroína espacial. Xunto ao piloto alieníxena Sparky e ao robot X-5, forma parte dunha organización secreta que ten como misión salvar a galaxia, nunha serie chea de acción, humor e aventura.

O mércores 24 será a quenda do especial ‘O abominable meniño das neves’, unha historia baseada nun relato de Terry Pratchett que aposta pola empatía e a convivencia a través da relación entre unha avoa, o seu neto e unha sorprendente criatura das neves. Este contido emitirase tamén na G2 o día 25.

O venres 26 estrearase o filme de anime ‘O neno e a besta’, do director Mamoru Hosoda, unha emocionante historia de aprendizaxe, amizade e crecemento persoal ambientada nun mundo fantástico, recoñecida en numerosos festivais internacionais. Recibiu o premio da Academia Xaponesa á mellor película de animación en 2016.

A última semana do ano estará dedicada a Wallace e Gromit, cunha selección das súas curtametraxes máis emblemáticas e premiadas. Así, o luns 29 porase á disposición ‘A aventura espacial’; o martes 30, ‘Os pantalóns trabucados’, e o mércores 31, ‘Polos pelos’. Estas curtametraxes, que tamén se emitirán pola segunda canle da TVG en días posteriores, gañaron numerosos premios internacionais.

Xa no novo ano, o venres 2 de xaneiro, aterrará en Xabarin.gal o filme xaponés ‘Belle’, unha reinterpretación moderna de ‘A Bela e a Besta’ ambientada nun mundo virtual, que explora a identidade, o dó e a beleza interior na era dixital. Esta película recibiu múltiples premios e candidaturas en festivais en 2021 e 2022.

A programación complétase o luns 5, véspera de Reis coa curtametraxe ‘Wallace e Gromit: un asunto de pan ou morte’, unha historia chea de intriga e comedia arredor dun misterioso caso que ameaza o novo negocio de panadaría de Wallace. Candidata aos Óscar e gañadora dun BAFTA á mellor curtametraxe de animación, emitirase na G2 o día 6. 

Como última novidade, o venres 9 volverá un clásico do Xabarín: a serie ‘Sarxento Keroro’, unha comedia de animación en que unha ra alieníxena e o seu peculiar exército chegan desde o planeta Keron coa intención de invadir a Terra, pero acaban vivindo situacións tan absurdas e divertidas que a conquista queda sempre en segundo plano.

Con esta programación especial, Xabarín.gal reafirma a súa aposta por un Nadal cheo de animación, humor e historias para compartir en familia, combinando estreas destacadas con series e personaxes xa imprescindibles para varias xeracións.

Santiago, 18.12.2025.- O programa da Televisión de Galicia ‘Cos pés na terra’ recibiu este mércores en Ciudad Real o premio Compromiso coa Igualdade no Desenvolvemento Rural, na categoría de Difusión. A Asociación de Familias e Mulleres do Medio Rural (Afammer) promove estes premios anuais, cos que recoñecen o liderado feminino, o  emprendemento e a igualdade no medio rural.

      ‘Cos pés na terra’, producido por Filmax, emítese desde hai máis dunha década na TVG, onde amosa homes e mulleres que elixen a vida no campo, e vivir da terra e da vida que esta lles proporciona. Son agricultores, gandeiras, artesáns, comerciantes de madeira, hostaleiras, entre outros, que cren firmemente que hai futuro no campo.

            Pola súa a súa contribución a visibilizar a vida e os proxectos desenvolvidos no rural a través do sector audiovisual, Afammer quixo salientar a traxectoria de ‘Cos pés na terra’, espazo que está dispoñible tamén na plataforma dixital AGalega.gal. O premio foi entregado polo alcalde de Ciudad Real. Recolleuno Susana Martínez de la Riva, xefa de Produción de Filmax.

            Estes premios anuais da Asociación de Familias e Mulleres do Medio Rural salientan o valor do futuro rural, a igualdade e o emprendemento e “serven para visibilizar e poñer en valor as iniciativas que son máis necesarias na contorna rural", incidindo na importancia de apoiar proxectos liderados por mulleres para combater a despoboación e xerar oportunidades.

            Neste 2025, ‘Cos pés na terra’ foi distinguido na antesala dos Premios Mestre Mateo cun premio especial ao impulso da sostibilidade polos seus máis de 200 programas divulgando a riqueza da vida rural.

Santiago, 14.12.2025.-  A película de animación 'Decorado', dirixida por Alberto Vázquez e producida por Chelo Loureiro, Iván Miñambres, Jose Mª Fernández de Vega e Nuno Beato obtivo este sábado á noite o premio a Mellor Longametraxe de Animación dos Premios Forqué.

O filme, participado polaTelevisión de Galicia, suma este galardón aos obtidos no no 'Fantastic Fest', un dos festivais do xénero máis importantes do mundo, en Austin (Texas, EUA), e no 'Animation Is Film', de Os Ánxeles (California), posicionado como un dos encontros de animación máis importantes a escala global. A película fora tamén seleccionada en Sitges, BFI London, Tokyo, Ottawa y Abycine, entre outros festivais internacionais.

Os Premios Forqué foron entregados en Madrid nunha gala á que asistíu o equipo da cinta, ao que acompañou o director de Proxección Social da CSAG, Xaime Arias.

Dirixida por Alberto Vázquez, director de éxitos como ‘Birdboy’, ‘Psiconautas’ e ‘Unicorn Wars’ a cinta plantexa unha fábula escura e hipnótica sobre o control social e o artificio da vida. Responsable de de éxitos como ‘Birdboy’, ‘Psiconautas’ e ‘Unicorn Wars’ e gañador de catro Premios Goya, o director galego asina unha fábula escura e hipnótica sobre o control social, o artificio da vida e a fraxilidade das nosas certezas. ‘Decorado’ combina sátira, surrealismo e humor negro, cun enfoque mordaz sobre a existencia humana. O seu protagonista é un cidadán aparentemente corrente que comeza a sospeitar que todo ao seu arredor -o seu traballo, a súa parella, a súa cidade- forma parte dunha xigantesca farsa. O que parece unha paranoia cotiá convértese nunha fuxida desesperada cara a algo que se pareza, aínda que sexa un pouco, á liberdade.

Televisión de Galicia segue apostando polo cine galego e confirmando cada ano a súa participación en novos proxectos. ‘Decorado’ foi unha das películas seleccionadas na convocatoria de apoio ao cine desenvolvida no 2024. Con guión de Alberto Vázquez e Francesc Xavier Manuel, ‘Decorado’ é unha produción de Abano Producións, Uniko, The Glow, María y Arnold A.I.E e Sardinha Em Lata. O proxecto conta co respaldo de TVG, RTVE, ETB, Movistar Plus+, ICAA, Agadic, a Deputación de Badaxoz, o Goberno Vasco e a Deputación Foral de Biscaia.

Santiago, 12.12.2025.-  Os Cines Tamberlick de Vigo acolleron este xoves a preestrea de ‘Rondallas’, película apoiada pola Televisión de Galicia, que aborda este fenómeno cultural a través dunha comedia vitalista do director Daniel Sánchez Arévalo.

         A preestrea reuniu o equipo técnico e artístico da película. O produtor Ramón Campos e o reparto reuníronse de novo neste pase especial para o público galego, ao que tamén acudiron o conselleiro de Cultura, Lingua e Xuventude, José López Campos; o director xeral de Cultura, Anxo M. Lorenzo; o director da Axencia Galega das Industrias Culturais, Jacobo Sutil; e o director de Proxección Social da CSAG, Xaime Arias.

         Javier Gutiérrez, María Vázquez e Tamar Novas encabezan o reparto 100% galego da que é a sexta película de Sánchez Arévalo, quen asina tamén o guión. Nela traballaron outras coñecidas caras do cine e a televisión, como Carlos Blanco, Xosé A. Touriñán, Marta Larralde, Judith Fernández ou Fer Fraga.

            A estrea estivo precedida pola actuación da rondalla El Gran Sol, creada ex professo para esta longametraxe con músicos de diferentes agrupacións. ‘Rondallas’ chegará aos cines o día de Ano Novo.

‘Rondallas’, filmada na provincia de Pontevedra

            Despois dunha traxedia no mar, a recuperación dunha vella rondalla para competir contra as vilas veciñas preséntase como o estímulo que une toda a vila para saír adiante e recobrar a ilusión. Esta é a historia da película que foi rodada en diferentes localizacións da provincia de Pontevedra. A Guarda foi o epicentro en 2024 da súa filmación, que se estendeu tamén aos concellos de Baiona, Oia, Tui e Vigo.

Santiago, 10.12.2025.-  Estrea dobre este martes en Pontevedra, que se vestiu de gala para celebrar o cinema galego apoiado pola Televisión de Galicia.

O Museo Provincial de Pontevedra acolleu a alfombra vermella da película ‘Me has robado el corazón’, participada pola canle pública e protagonizada por Óscar Casas e Ana Jara. Os actores da cinta Antonio Pagudo, Xurxo Carreño, Lucía Veiga e Francis Lorenzo participaron tamén na estrea, nun evento ao que acudiron os produtores da película, Mamen Quintas e Julio Casal, e no que a CSAG estivo representada polo seu director de Proxección Social, Xaime Arias. Asistiron tamén o conselleiro de Cultura, Lingua e Xuventude, José López Campos; o presidente da Deputación de Pontevedra, Luis López Diéguez; e o director de Agadic, Jacobo Sutil.

Festival Novos Cinemas

Este mesmo martes, e tamén en Pontevedra, inaugurouse o Festival Novos Cinemas coa proxección no Teatro Principal da cinta ‘Liñas descontinuas’, participada pola Televisión de Galicia. A xefa de Contidos da CSAG, Montse Besada, acudiu ao pase da película. Despois da súa recente estrea mundial no Festival Internacional de clase A Tallinn Blacknights Film Festival e da estrea nacional no Festival de Xixón, o filme ten a súa estrea galega no festival pontevedrés. 
 

Santiago, 04.12.2025.-  A Corporación de Servizos Audiovisuais de Galicia (CSAG) producirá 12 novos proxectos ao abeiro da convocatoria de contidos dixitais en galego, recentemente resolta pola Comisión Directiva de Avaliación de Proxectos. Catro destes proxectos destinaranse á plataforma infantil e xuvenil Xabarín.gal, e oito incorporaranse a AGalega.gal. Cun investimento total de 339.000 euros, a CSAG impulsa novas propostas de índole divulgativa, infantil, de entretemento e de ficción, concibidas especificamente para a contorna dixital.

Na categoría de ‘Entretemento’, e cun orzamento máximo de ata 26.000 € por proxecto, foron elixidos tres proxectos: ‘Amor con interese’ de Cristela Torres Nine, un dating show que xoga cos límites entre realidade e intelixencia artificial e explora, con humor, as relacións no mundo dixital; a segunda temporada de ‘O mellor tractor do mundo’ de A revolta producións, concurso no que tractoristas galegos compiten en probas de habilidade e destreza e no que o público decide quen avanza a través das votacións ata chegar á gran final; e ‘Se non o vexo, non o creo’ de Jaime Pardo Valdés, unha serie de microespazos sobre historias tan insólitas que parecen inventadas. Cun ton humorístico e retranqueiro, o presentador percorre lugares e protagonistas para comprobar se cada caso “se sostén”. 

Na categoría de ‘Divulgación’ e tamén cun orzamento máximo de ata 26.000 € por proxecto, foron elixidos tres proxectos: ‘Club de Lectura’ de Chiripa Producións, un espazo de fomento da lectura dirixido á mocidade arredor dun club de lectura singular no que se analizan os libros obrigatorios do instituto cun enfoque fresco, contextualizado e conducido por unha comunicadora nova con gran conexión co público adolescente; ‘Camiño ao podio’ de Miramemira,S.L., serie documental que une deporte de alta competición e adolescencia. A través dos seus cinco episodios o programa segue as historias de 10 mozos e mozas do Centro Galego de Tecnificación Deportiva (CGTD) que perseguen o soño de converterse en atletas profesionais; e finalmente, a segunda temporada de ‘Sexo con senso’, de Xosé Antón Moure Ferreiro, un formato sobre educación afectivo-sexual, abordado con rigor e proximidade, no que se tratan temas clave para a saúde emocional, igualdade, afectos e relacións nun contexto onde estas cuestións comezan a recibir a atención que merecen.

No eido da ‘Ficción’, e neste caso cun orzamento máximo de ata 35.000 € por proxecto, resolveuse a selección de tres contidos: ‘Morgana en Esmelle’ de Aqueladas S. Coop. Galega, unha adaptación da obra homónima de Begoña Caamaño; ‘Hai que ir morrendo’ de Aqueladas S. Coop. Galega, unha ficción cómica na que escritoras e escritores galegos aparecen asasinados en circunstancias vinculadas ás súas novelas negras; e ‘Picariños’ de Coven Films, a segunda temporada desta serie de ficción protagonizada por un grupo de rapaces que descobre un mapa misterioso durante un campamento de verán. 

Catro novos contidos para Xabarín.gal

‘Picariños’ sumarase a outros tres proxectos destinados á plataforma Xabarín.gal, que foron seleccionados na categoría ‘Infantil’, cun orzamento máximo de ata 26.000 € cada un. Son ‘Elowa, un camiño para sentir’ de Aqueladas S. Coop. Galega, unha serie de animación creada por e para persoas autistas, pensada para axudar á identificación e comprensión das emocións a través dunha historia fantástica e respectuosa coa diversidade; ‘Nutritives’ de Henfunk Studio S.L, tamén serie de animación na que alimentos, órganos e partes do corpo teñen vida propia e resolven misterios relacionados coa saúde, a nutrición e o corpo humano cun enfoque educativo e divertido. Por último, chegará a Xabarín.gal ‘Son soniños’ de H501- Laura Pazienza Signo, un contacontos para escoitar e imaxinar pero cunha base visual sólida, a medio camiño entre a animación convencional e o conto infantil na que a Curuxa Maruxa se converte na gardiá das historias que soñan os nenos e nenas.

Os proxectos seleccionados produciranse no primeiro semestre de 2026 e posteriormente serán estreados nas plataformas dixitais Xabarín.gal e AGalega.gal

Santiago, 1.12.2025.-  A plataforma dixital AGalega.gal continúa ampliando a súa oferta e incorporando novos títulos culturais, divulgativos e de ficción esta semana, sempre en sintonía coa programación da CSAG. A principal novidade chega o mércores 2 coa estrea de ‘No seu lugar, outro’, unha serie dixital que reúne escritores e cineastas para reflexionar, mediante pezas audiovisuais de creación, sobre o concepto de lugar e a relación co espazo que habitamos, abordado desde distintas miradas. As tres obras que conforman a colección están realizadas polas parellas creativas Lucía Aldao e Coral Piñeiro, Fran Rodríguez e Keith Payne, e Álvaro Gago e Berta Dávila.

As estreas semanais comezan hoxe co último capítulo de ‘Terra de cómics’, centrado na autora viguesa María Vilar, que abre as portas da súa escola para amosar o seu proceso creativo marcado polo uso da acuarela, así como as súas influencias e traxectoria no mundo da banda deseñada.

O xoves 4 chega á plataforma o filme ‘Especiais’, dispoñible durante 30 días. A longametraxe segue a historia de Bruno e Malik, dous amigos que levan vinte anos dedicados ao acompañamento de persoas con autismo a través de entidades sen ánimo de lucro. Formando novos coidadores, impulsan unha organización pouco convencional que traballa con casos complexos e con persoas extraordinarias. Este mesmo día publicarase tamén un novo capítulo de ‘Bótalle azucre’.

A semana péchase o venres 5 coa estrea da miniserie ‘The Cry’, dispoñible en versión orixinal subtitulada ao galego. A ficción relata a viaxe a Australia de Joanna e Alistair xunto ao seu bebé, Noah, unha estadía que se converte nun pesadelo tras a misteriosa desaparición do pequeno, un suceso que marcará para sempre a parella.
 

Santiago, 24.11.2025.- O Festival Internacional de Xixón acaba de destacar o talento audiovisual galego con dous importantes recoñecementos para dúas longametraxes participadas pola Televisión de Galicia, ‘Así chegou a noite’, de Ángel Santos, e ‘As liñas descontinuas’, de Anxos Fazáns.

O cineasta pontevedrés Ángel Santos foi distinguido co premio á Mellor Dirección na Sección Internacional Albar pola súa última longametraxe, ‘Así chegou a noite’, que contou coa participación da TVG e que este domingo clausurará Cineuropa, en Santiago, na súa estrea galega.

A película, estreada mundialmente en Xixón, supón o regreso de Santos á dirección unha década despois de ‘As altas presións’ (2014). Trátase dun drama intimista rodado en localizacións da provincia de Pontevedra, onde un escultor se instala nunha remota zona rural da costa galega e inicia un proceso de illamento que se interrompe coa chegada dunha antiga amante.

O proxecto naceu da man de Andrea Vázquez (Miramemira) e continúa agora da man de Maruxiña Film Co, produtora do cineasta Alfonso Zarauza. A produción complétase con Amateurfilms, do propio Ángel Santos, e con Matriuska Producións, de Daniel Froiz. A cinta conta co apoio de Agadic, da Deputación de Pontevedra e da Televisión de Galicia.

Mellor Guión para ‘As liñas descontinuas’

Pola súa banda, Anxos Fazáns e Ian de la Rosa recibiron o premio Dama ao Mellor Guión por ‘As liñas descontinuas’, longametraxe tamén participada pola TVG. O filme, rodado integramente en galego en Marín e Vigo e coproducido pola compañía galega Sétima, viviu hai uns días a súa estrea mundial na 29ª edición do Tallinn Black Nights Festival, onde tamén competía na sección oficial.

A protagonista de ‘As liñas descontinuas’ é unha muller de 50 anos que está nun proceso de separación e debe abandonar o fogar familiar. O seu encontro fortuíto cun universitario de 28 anos é utilizado pola directora para falar de precariedade laboral, de falta de oportunidades, de transexualidade e de novos camiños.

Esta longametraxe de Fazáns inaugurará en decembro o Festival Novos Cinemas de Pontevedra, que precisamente clausurará ‘Así chegou a noite’, consolidando así a forte presenza do cinema galego nos principais certames internacionais e autonómicos. 

Santiago, 21.11.2025.-  O Xabarín da Televisión de Galicia saltará ao céspede do estadio Anxo Carro de Lugo este sábado no descanso do derbi que enfrontará o CD Lugo e o Pontevedra CF, de 1ª RFEF, e que vai retransmitir a Televisión de Galicia pola G2 desde as 16.15 horas.

A mascota do Club da Galega viaxa a Lugo para participar no derbi xunto con Nabic, a mascota lucense, e celebrar os 40 anos da TVG e da Radio Galega, cumpridos neste 2025, e os 40 anos de retransmisións e apoio ao fútbol galego.

Os espectadores poderán seguir a emisión do derbi a través da segunda canle da Televisión de Galicia, narrada por Patricia Rodríguez e Dani Mallo, e con Emilio González, Fer Romero e Rafa Porto nos micrófonos da Radio Galega.

O Lugo e o Pontevedra veñen de sumar cadanseu empate na xornada pasada, que os deixa nunha situación cómoda na clasificación, aínda que un chisco lonxe dos primeiros que optan ao ascenso directo e á promoción.