A TVG pecha 2023 cun 11 % de audiencia, o mellor dato desde 2012 - CRTVG
A TVG pecha 2023 cun 11 % de audiencia, o mellor dato desde 2012
O prime time da Galega destaca cun 11,1%.
Os servizos informativos da TVG son os máis vistos, chegando ao 92% da poboación de máis de 4 anos.
Santiago, 02.01.2024.- A Televisión de Galicia pechou o 2023 no 11% de cota, o dato máis elevado desde hai once anos. A Galega é a preferida da audiencia tanto para informarse como para se entreter. Así, os espazos informativos da TVG son os máis vistos en Galicia, e no entretemento, na franxa máis vista do día, o prime time, a TVG acadou un 11,1 % de media, a cota máis elevada dos últimos sete anos.
Nun momento de importantes avances, marcados polo forte investimento en innovación tecnolóxica e a piques de estrear a nova plataforma dixital, a TVG segue a ser un ano máis a canle pública máis vista de Galicia, superando a TVE en case 2 puntos (9,3%).
Líder en informativos
Os servizos informativos da TVG foron os máis vistos en Galicia neste 2023. Contaron cunha audiencia total de 2.415.000 telespectadores, o 91,8 % dos galegos de catro e máis anos.
Neste eido destacan as cotas dos informativos da franxa do mediodía, o espazo de noticias de proximidade ‘Galicia noticias’, cunha media anual do 20,8 %, e o ‘Telexornal mediodía’, cunha cota media do 18,8 %. Por días da semana, salientaron as cotas de pantalla dos días laborables: luns (11 %), martes (11,2 %), mércores (11,3%), xoves (12,4%) e venres (12,1%). E no prime time os datos dos xoves (12,4 %) con ‘Land Rober Tunai Show’, os venres con ‘Luar’ (12,3 %) e os sábados con ‘Bamboleo’ (11,1 %).
Por outra parte, TVG segue a ser un ano máis unha das canles motor da rede de televisións autonómicas de FORTA, superando este grupo en 2,5 puntos de cota.