'Os gardiáns do mar' será esta semana testemuña de como se loita contra o narcotráfico por mar e aire

Santiago, 13.04.2025.-  Os espectadores da TVG acompañarán esta semana ‘Os gardiáns do mar’ nun control de transporte de peixe na provincia de Ourense. Pasarán da terra ao aire subidos no Argos, un helicóptero do Servizo de Vixilancia Aduaneira, en que van ser testemuñas de como se loita contra o narcotráfico desde as alturas. Ademais, o equipo do programa mergullarase cos submarinistas da Garda Civil no porto da cidade da Coruña para buscar explosivos. 

Todo ten a súa primeira vez, e ‘Os gardiáns do mar’ asistirá ao primeiro rescate de salvamento do Elmer 401, xa que un mariñeiro ferido precisa asistencia de inmediato. Ademais, unha patrulleira e un helicóptero do Servizo Marítimo da Garda Civil traballarán unidos nunha vixilancia conxunta na costa galega. O programa deste domingo acabará patrullando contra o narcotráfico, pero de esta vez desde mar, embarcado na patrulleira Águila 5.