CRTVG Viva

Santiago, 13.6.2025.-   ‘Luar’ (21:50 h) continúa esta noite sendo o escenario das semifinais de Miss Vaca 2025, o certame da televisión galega que pon en valor a fermosura do noso gando. Logo das semifinais dedicadas ás provincias de Lugo -onde se impuxo Linda- e Pontevedra -con Boneca acadando un espectacular 76 % dos votos-, este venres chega a quenda da provincia da Coruña.

As protagonistas da noite serán Rubia, amadriñada pola actriz e presentadora Lucía Regueiro, e Redonda, que conta co apoio do humorista Marcos Pereiro como padriño. Ambas loitarán polo pase á gran final deste concurso que, semana tras semana, mantén á audiencia enganchada.

O apartado musical estará encabezado polo andaluz Paul Thin, artista revelación da última edición de Operación Triunfo, que presentará o seu tema ‘Vértigo’. Tamén subirá ao escenario La Pelopony, quen interpretará o seu novo sinxelo ‘Chamán’, e a festa continuará coa Orquestra Triunfo. Completan o cartel da noite o grupo folk coruñés Breo, con ‘Canto raibas’, e os tradicionais Arume de Caión e as Pandeireteiras Lucerniñas, que achegarán os sons máis auténticos da nosa terra.

No concurso ‘Vai de baile’, medirán calidades artísticas as parellas Lumieira e Maloserá, e en ‘Recantos’ competirán Brian Cameselle, representante de Vigo, e José Carballido, procedentes da comarca de Noia-O Barbanza. O toque de humor correrá a cargo da incombustible Sra. de Palmírez, que volverá sorprender coas súas ocorrencias.
 

Santiago, 12.06.2025.-  A noite do venres está reservada ao fútbol sala na primeira edición da semana de ‘Galicia en goles’. A partir das oito e media do serán, Paco Santos conduce a cobertura do segundo partido polo ascenso á Primeira División de fútbol sala entre o Málaga e o Parrulo Ferrol. O equipo galego sumou o primeiro punto da eliminatoria goleando na Malata e está a corenta minutos de regresar á elite. Así e todo, en caso de sufrir unha derrota na pista andaluza, tería a semana que vén unha nova oportunidade, e desta volta, ante a súa afección. A primeira xornada do Rally de Ourense e os cuartos de final do trofeo de fútbol cadete Ourense Provincia Termal completan a axenda da xornada.

O sábado, desde as dúas e vinte da tarde e ata as doce da noite, Roberto Carlos Carballo e Rodrigo Pérez Pardo atenderán ao comezo no Palau da final da liga masculina de hóckey a patíns entre o Barcelona e o Liceo. O fútbol estará presente coa final da Copa de Lugo en Castro de Ribeiras de Lea entre o Taboada e o Chantada, ademais da final de veteranos en Santiago de Compostela entre o Rácing de Ferrol e o Sárdoma. A canteira tamén terá cobertura, xa que no estadio do Couto xogaranse as semifinais do torneo cadete no que compiten seis clubs: Celta, Pabellón, Real Madrid. Atlético de Madrid, Athlétic de Bilbao e O Porto. O comezo das finais de ascenso á Primeira de fútbol sala feminino coa participación do Vilalba e o Bembrive e o campionato galego de fondo en estrada desde O Porriño pecharán a tarde de retransmisións.

O domingo, a edición matinal situará a audiencia no campo da Madroa, en Vigo, onde os futbolistas dos equipos de integración do Celta e do Deportivo xuntaranse con presentadores coñecidos da Radio Galega e da Televisión de Galicia no partido de celebración dos 40 anos da nosa corporación. O evento integrase dentro do torneo que organiza Míchel Salgado, ex-xogador do Celta, Real Madrid e selección española. Durante a mañá, o Lugo B-Antas pola Copa de Lugo feminina e o desafío Delio Fernández de ciclismo en Moaña terán cadanseu punto de directo. Xa pola tarde, desde as dúas e vinte e ata as doce da noite, o fútbol de ascenso terá ampla presenza, co Pulpileño-Sarriana, Beluso-Cambados e Céltiga-Atios. Cando remate a xornada, contra as dez da noite, os especialistas de ‘Ao contraataque’ analizarán todo o sucedido cos nosos equipos e debaterán sobre a apertura do Mundial de clubs nos Estados Unidos.

#GaliciaEnXogo

O sábado, de once a doce da noite, o proxecto que leva o cancelo de #GaliciaEnXogo estará en antena cos espazos especializados. A primeira media hora será para o motor e a celebración do Rally de Ourense, puntuable para o campionato de España. Ao remate chegará a actualidade da crónica olímpica, co día a día dos galegos que preparan os Xogos dos Ánxeles 2028.

Santiago, 10.06.2025.-        A CRTVG lanza unha nova convocatoria de contidos dixitais, cunha achega de ata 357.000 euros, para a produción de 15 novos proxectos destinados ás plataformas AGalega.gal e  Xabarin.gal.

    A Corporación distribuirá este orzamento entre proxectos de cinco categorías, ficción, entretemento, divulgación, infantil e videopodcast, que teñen que estar integramente realizados en galego. Todos os detalles da convocatoria atópanse no Portal de Transparencia da CRTVG, nesta ligazón.

    A CRTVG busca seleccionar contidos que incorporen innovación e modernidade na forma de achegalos ao espectador, que promovan a interacción e que destaquen pola orixinalidade da súa estrutura narrativa e enfoque. Os proxectos deben ser inéditos, integramente orixinais e que non fosen postos á disposición do público, agás no caso de novas temporadas de proxectos presentados en anteriores convocatorias. Con esta nova convocatoria dáse continuidade ao apoio dos medios públicos galegos aos profesionais galegos e á difusión de proxectos audiovisuais a través das súas canles dixitais.

Santiago, 09.06.2025.-  Máis música e cultura galega nos medios públicos: ‘A nosa movida’ estréase esta semana en AGalega.gal e chegará tamén ás noites dos xoves en Televisión de Galicia. Conducido por Duarte Galbán, ‘A nosa movida’ ofrécese primeiro na plataforma dixital, este mércores 11, con Tanxugueiras como convidadas de luxo.

Gravado na emblemática sala Capitol de Santiago, o espazo ofrecerá entrevistas sen filtros con artistas galegos e actuacións en directo nun formato fresco, próximo e comprometido coa cultura do país, e que poderá verse na TVG os xoves despois de ‘Land Rober Tunai Show’.

Ficción galega, documentais e máis cine para a plataforma 

Outra estrea desta semana é ‘Nómades’, microserie de ficción galega que mergulla os espectadores nunha fin de semana crucial para dúas amigas, Martina e Sofía, que se enfrontan a verdades ocultas tras anos de amizade. A ficción supón un retrato íntimo sobre as decisións vitais e os camiños cambiantes, contado con sensibilidade e autenticidade.
    
Dentro do xénero documental ofrecerase desde o xoves ‘Naturalista do rural’, microserie sobre a natureza vista polos ollos da xente do campo. Cómpre salientar, amais, o programa ‘Xogas: novos horizontes deportivos’, que explora prácticas deportivas pouco coñecidas pero presentes no día a día.

E o venres 13 incorpórase a AGalega.gal ‘Desmontando a Barbie’, unha longametraxe documental que analiza seis décadas de historia da boneca máis famosa do mundo desde unha perspectiva feminista e de transformación social. A peza detense no chamado ‘Proxecto Amencer’ de Mattel, que buscou reinventar o mito de Barbie para conectar coas mulleres contemporáneas. Estará dispoñible só ata o 23 de xuño, polo que esta será a última oportunidade para vela na plataforma. Ademais,  esta semana a plataforma disporá das seguintes longametraxes: ‘Saúl, a viaxe a Damasco’, un filme relixioso sobre a conversión de Saulo de Tarso; ‘Os miserables’, thriller francés cheo de tensión nos suburbios de París, e a comedia romántica ‘Amor a distancia’ que se estreará o sábado 14.

En Xabarín.gal, máis animación e curtametraxes galegas

Os pequenos da casa disporán en Xabarin.gal, tamén desde o venres, de novos capítulos da serie de animación ‘Moby dick’. A maiores, a partir da próxima fin de semana incluiranse as curtametraxes do programa escolar ‘Nós tamén creamos!’, todas as curtas finalistas e as gañadoras. A gala de entrega de premios será o vindeiro día 18 de xuño.          

Santiago, 05.06.2025.-    A longametraxe galega 'Xustiza artificial', coprodución hispano-portuguesa participada pola Televisión de Galicia alzouse este xoves co Premio Celtic Media Festival 2025 na categoría Single Drama (filme dramático). Recolleron o premio Fernando R Ojea, director de Contidos da CRTVG, e Montse Besada xefa de Contidos da TVG.

    O coruñés Simón Casal dirixiu e coescribiu este filme ambientado en Galicia, con especial protagonismo da cidade da Coruña. Protagonizado por Verónica Echegui, Alberto Amman, Tamar Novas e Alba Galocha, é unha coprodución hispano-portuguesa con participación de Abano Producións e da TVG. A cinta foi estreada en setembro de 2024.

    A 46ª edición do Celtic Media Festival celébrase esta semana na vila inglesa de Newquay, en Cornualla. Este festival, que promove a cultura e linguas dos países celtas nos ámbitos do cinema, a televisión, a radio e os novos medios de comunicación, ten lugar desde hai 46 anos de forma rotatoria entre Irlanda, Escocia, Gales, Illa de Man, Cornualla e a Bretaña francesa.

É unha cita obrigada para poñer en valor os produtos audiovisuais galegos no ámbito internacional e nel a CRTVG establece sinerxías con televisións internacionais europeas, que posibilitan, entre outras cousas, acordos de cesión de contidos e proxectos comúns. As producións da TVG compiten cada ano con canles como a británica BBC, as irlandesas RTE e TG4, a galesa S4C, a escocesa MG Alba ou a bretoa FR3. 

Premio tamén para o reality da TVG ‘Pesca total’

Ademais deste galardón, onte mércores o reality da TVG ‘Pesca total’ foi premiado no certame a categoría de ‘Factual Entertainment’. Trátase dun programa creado pola produtora Outro para TVG, en que seis concursantes compiten por converterse en mariñeiros a bordo do barco ‘Praia de Sanxenxo’. Foi a segunda vez nos 40 anos de vida da canle pública que un programa de TVG de non ficción recibe un premio internacional, despois do acadado polo informativo de humor ‘Malicia noticias’ en 2022. 

Santiago, 04.06.2025.-    A produción da Televisión de Galicia ‘Pesca total’ foi galardoada este mércores co premio do Celtic Media Festival na categoría de Factual Entertainment (entretemento baseado en feitos reais) no transcurso dunha gala celebrada en Newquay, Cornualla (Reino Unido), onde esta semana ten lugar o festival.

‘Pesca total’ é un reality creado pola produtora Outro para TVG, en que seis concursantes compiten por converterse en mariñeiros a bordo do barco ‘Praia de Sanxenxo’. Emitido xa na TVG, ‘Pesca total’ competía con catro proxectos finalistas da BBC, un da canle irlandesa TG4 e outro da televisión de Gales S4C. O espazo está dispoñible na plataforma dixital dos medios públicos, AGalega.gal

Esta é a segunda vez nos 40 anos de vida da canle pública que un programa de TVG de non ficción recibe un premio internacional, despois do acadado polo informativo de humor ‘Malicia noticias’ en 2022. Neste foro profesional europeo recoñécense cada ano os mellores traballos do sector en televisión, radio e novos medios dos países celtas.

Recolleu o premio Fernando R Ojea, director de Contidos da CRTVG xunto a Esther González e Iago Veloso, da produtora Outro.

Este xoves haberá unha nova gala de entrega de premios. Desvelaranse máis galardóns, aos que optan as películas ‘As Neves’ e ‘Xustiza artificial’ (na categoría Single Drama, ou filme dramático). Na categoría de Drama Series, a CRTVG compite tamén con ‘Na Gloria’, comedia que combina retranca, costumismo surrealista e humor absurdo. A CRTVG conta tamén con outras nominacións. Destaca no medio radiofónico. Kiko Novoa como candidato a Presentador do Ano, e a Radio Galega opta ao recoñecemento como Mellor Estación de Radio.

No apartado Factual Series, competirán dúas producións da TVG, ‘Os ríos da vida’, unha serie que percorre os cursos fluviais galegos explorando as historias que agochan; e ‘Curando o mundo’, un seguimento do cirurxián Diego González Rivas na súa misión de ensinar polo mundo a súa innovadora técnica de cirurxía pulmonar minimamente invasiva. Outras candidaturas son as de ‘Recollendo músicas’ (Arte), unha serie que explora a pegada da música tradicional galega nas composicións actuais; ‘e ‘Raíña-me’ (na categoría de Short Form), espazo en que a artista Alexa Evans axuda a transformar a estética de persoas que queren converterse en auténticas drag queens.

    O Celtic Media Festival, que promove a cultura e linguas dos países celtas nos ámbitos do cinema, a televisión, a radio e os novos medios de comunicación, ten lugar desde hai 46 anos de forma rotatoria entre Irlanda, Escocia, Gales, Illa de Man, Cornualla e a Bretaña francesa. Trátase dunha cita obrigada para poñer en valor os produtos audiovisuais galegos no ámbito internacional e nel a Corporación establece sinerxías con televisións internacionais europeas, que posibilitan, entre outras cousas, acordos de cesión de contidos e proxectos comúns.

As producións da TVG compiten cada ano con canles como a británica BBC, as irlandesas RTE e TG4, a galesa S4C, a escocesa MG Alba ou a bretoa FR3. Entre as producións que optan aos galardóns atópanse ficcións, documentais, programas de entretemento e proxectos radiofónicos que reflicten a diversidade e a calidade da programación da CRTVG.

Santiago, 02.06.2025.-  A semana comeza na plataforma AGalega.gal, cunha programación variada que combina música en directo, deporte, formatos dixitais innovadores e cinema internacional. Do 1 ao 7 de xuño, cada día chega cunha estrea diferente para todos os públicos.

Hoxe destaca a estrea do concerto ‘Unha noite de inverno’, unha experiencia musical gravada na Igrexa monasterial de Meira. O multiinstrumentista Abraham Cupeiro lidera esta proposta acompañado por unha coidada selección de artistas convidados: Davide Salvado, Matthew Ward, Alba Barreiro, Antonio Cienfuegos, Cibrán Seixo, e a acordeonista Sabela Caamaño. 

A plataforma ten dispoñible tamén ‘O máis pop’, unha nova sección dentro do contido deportivo de AGalega.gal que ofrece unha ollada fresca e dinámica a disciplinas con forte pegada en Galicia, como o atletismo, o ciclismo e o piragüismo. 

O mércores 4 será a quenda da innovación dixital con ‘Nail Clue’, un programa presentado por Nuria Vil e dirixido á mocidade. Nela, tres artistas manicuristas compiten durante cinco horas para sorprender cun deseño de unllas postizas inspirado nun cliente misterioso. 

A plataforma incorpora tamén o venres unha nova entrega do programa ‘Galegos’ cunha entrevista a Xosé Luís Barreiro, político, profesor de Ciencias Políticas e autor de ‘A terra quere pobo’.

Cine internacional para todos os gustos: aventura, drama e comedia

No apartado cinematográfico, AGalega.gal ofrece esta semana unha coidada selección de filmes internacionais dispoñibles por tempo limitado. Incorpórase ‘A cidade perdida de Z’ (martes 3), baseada na historia real do explorador Percy Fawcett e a súa busca dunha civilización na Amazonia; ‘Capitán Fantástico’ (xoves 5) propón un retrato orixinal sobre a crianza alternativa e os conflitos co mundo moderno, que estará dispoñible 7 días; ‘Persecución ao límite’ (venres 6) é un thriller de acción nas rúas de Alemaña, onde o amor e a supervivencia son protagonistas, e para pechar a semana, chega a comedia francesa ‘Lola e os seus irmáns’ (sábado 7), unha historia entrañable sobre vínculos familiares. Todas estas películas estarán accesibles durante 7 días, agás esta última comedia, que poderá verse ao longo de 30 días.

En Xabarin.gal, todas as cancións de ‘Bibopalula’ e estrea da serie ‘Nubes’ 

A plataforma infantil Xabarin.gal pon a disposición da cativada desde este xoves as cancións da serie de animación musical ‘Bibopalula’. O sábado 7 comeza a xira do espectáculo teatral baseado nesta serie coproducida pola CRTVG, que foi, no seu lanzamento, unha das favoritas da audiencia.

Esta semana tamén chega á plataforma infantil ‘Nubes’ (venres 6), unha serie web infantil que busca que os nenos e nenas coñezan a natureza atmosférica. Está realizada con animación 2D e nela unha pequena nube vivierá unha aventura onde coñecerá outras formacións gaseosas en busca da lendaria Nube Arco da vella.
 

Santiago, 28.05.2025.-   Televisión de Galicia presenta en primicia ‘Lume’, a súa nova serie de ficción, este venres 30 de maio ás 21:00 h no Festival Internacional de Series Ría de Vigo nun evento ao que asistirán os seus protagonistas, Cristina Castaño, Isabel Naveira ou Xúlio Abonjo, e a súa directora, Giselle Llanio. O acto estará presentado polo reporteiro da TVG Óscar Cruz e contará con caras coñecidas da canle, actores, presentadores e profesionais do sector audiovisual.

    ‘Lume’, un thriller xornalístico con fondo social e ecolóxico composto por seis capítulos, chegará o vindeiro 20 de xuño  á TVG. Trátase dunha coprodución galego-portuguesa con TVG e a  RTP na parte pública, e co apoio do AGADIC, e de Setemedia e da produtora lusa Coral Vision Europa, na parte privada.

    ‘Lume’ está rodada en galego e portugués e narra a historia de Lucía (Cristina Castaño), unha xornalista galega asentada en Lisboa que regresa á súa localidade natal tras un devastador incendio forestal. Convencida de que o lume non foi accidental, inicia unha investigación que revelará unha rede de intereses económicos e políticos vinculados aos incendios, que porán en risco a súa vida. O actor portugués Albano Jerónimo acompaña a Castaño no elenco, xunto a intérpretes galegos como Alfonso Agra, Xúlio Abonjo e Isabel Naveira.

    A serie, que combina drama, suspense e unha potente mensaxe ambiental, destaca pola súa narrativa intensa e pola beleza dos escenarios da Eurorrexión Galicia-Norte de Portugal, que funcionan como un personaxe máis da historia. A dirección está a cargo de Giselle Llanio e a música é obra da compositora galega Carme Rodríguez.

    Con esta aposta pola coprodución internacional e a ficción de calidade, a TVG reafirma o seu compromiso co audiovisual galego e con historias con vocación global. O Festival Internacional de Series Ría de Vigo, na súa primeira edición, aspira a converterse nun escaparate clave para as series, un terreo no que a TVG ten un gran peso específico tras máis de 30 anos facendo series de ficción en galego.

Santiago, 28.05.2025.-   A CRTVG pechou 2024 cun resultado orzamentario positivo por un importe de 1,3 millóns de €, como reflicten as contas anuais presentadas este mércores no Parlamento de Galicia polo seu director xeral, Alfonso Sánchez Izquierdo. Por 16º ano consecutivo, a CRTVG rematou o exercicio pasado coas contas en superávit.

    Estes resultados orzamentarios consolidados poñen de manifesto a eficacia da xestión e o saneamento das contas. Sánchez Izquierdo lembrou que a actual dirección recibiu en 2009 unha Corporación cunha débeda de 51 millóns de euros, e que coa nova xestión e o control de gastos, e con orzamentos menores que en anos precedentes, xa en 2013 conseguiu eliminar a débeda bancaria, e en anos posteriores seguir reducindo a débeda ata os números actuais. O director xeral incidiu nesta eficiencia na xestión económica, indicando que no 2009 o orzamento fora de 146,9 millóns de euros, mentres que no 2024 foi de 128,2 millóns, “que en valores absolutos son 18,7 millóns menos e actualizados ao IPC acumulado son 28 millóns de euros”.

Cadro de persoal

    Respecto dos recursos humanos e do compromiso sostido coa estabilidade no emprego, o director xeral expuxo que un ano máis seguiu reducíndose a contratación temporal e que, nunha continuación do iniciado coas OPE de 2021, 2022 e 2023, “neste 2024 aprobouse unha nova Oferta de Emprego Público con 10 prazas por concurso-oposición e 9 prazas de promoción interna”. Como resultado, “nos últimos 4 anos a Corporación ofertou un total de 315 prazas, acadando a consolidación do 100% do cadro de persoal” fronte ao 40% de temporalidade no emprego existente ao comezo da súa xestión”. O director xeral especificou que o gasto na partida de persoal ascendeu no 2024 a 54,7 millóns de euros.     
    
Apoio social e audiencias

    Izquierdo referiuse tamén á enquisa sobre a percepción do servizo público de comunicación audiovisual de Galicia desenvolvida no 2024, que concluíu que case 7 de cada 10 galegos afirman que a TVG cumpre a súa misión de servizo público e teñen unha imaxe de marca positiva da TVG. O estudo sinala tamén que máis de dous terzos da poboación galega que ve televisión son espectadores algunha vez ao mes da TVG e case 8 de cada 10 xulgan a TVG como socialmente útil. Estes datos teñen a súa correspondencia nas audiencias. A TVG pechou 2024 sendo a canle máis vista de Galicia e a autonómica máis vista de España, segundo os datos do Estudo Xeral de Medios, e a terceira autonómica máis vista de España, segundo os datos de Kantar Media.

    2024 foi o ano da creación das tres plataformas dixitais da Corporación: AGalega.gal, AGalegaAudio e Xabarin.gal.  As tres conforman a maior oferta audiovisual de contidos en galego do mundo, e sen custo para o usuario. AGalega.gal   rematou 2024 con preto de millón e medio de usuarios e sendo descargada en máis de 200 países, cumprindo co seu obxectivo de multiplicar o impacto dos contidos da canle e do sector audiovisual galego.

Santiago, 26.05.2025.-  A plataforma dixital AGalega.gal estrea esta semana as series  ‘Diamante en bruto’ e ‘Historias a pé de páxina’. O mércores 28 chega á plataforma a serie galesa ‘Diamante en bruto’, un intenso thriller criminal onde Carbo, un mozo experto en roubo de coches, se ve atrapado nunha rede de crimes, mentiras e segredos tras implicarse nun golpe organizado por unha familia do norte de Gales. Todos os episodios estarán dispoñibles desde o primeiro día.

A quenda da nova serie documental galega ‘Historias a pé de páxina’ será o xoves 29, que recolle feitos, personaxes e anécdotas esquecidas da nosa historia, como o primeiro tranvía a vapor, a vida do limpabotas o Merlo ou a sorprendente conexión entre Dalí e unha empresa galega. Unha colección de capítulos que reivindican o valor das notas marxinais da nosa memoria colectiva.

O domingo 25, coincidindo co Día do Orgullo Friki, estrearanse os dous últimos capítulos do programa ‘Galician Friki’. Nestes episodios explorarase o Starfest de Oleiros, a ExpOtaku da Coruña, o 85 aniversario de Batman e os perfís máis frikis de Nuno Pico e Antón Losada.

Destacan tamén as estreas do martes 27 cun clásico do cine distópico: ‘Brazil’. Neste filme, Sam, un burócrata tímido, descobre o lado máis escuro dun sistema tecnolóxico que controla ata o máis mínimo detalle da vida. O filme estará dispoñible durante 7 días. Ese mesmo día tamén se lanzará un novo episodio do videopodcast ‘Satélite Xabarín’, dispoñible en AGalega.gal e AGalegaAudio.gal. Nesta ocasión o programa revive a historia de Korosi Dansas, unha banda pioneira do ‘rock de batea’ que cantaba ao medio ambiente e á igualdade de xénero. Josito Porto e Manuel Seixas serán os convidados especiais.

A programación complétase coas películas ‘Tempo de matar’ (venres 30), un drama xudicial sobre racismo e xustiza no sur dos Estados Unidos, e ‘París pode esperar’ (sábado 31), unha viaxe emocional e sensorial polas paisaxes, sabores e praceres culturais de Francia.

Santiago, 22.05.2025.- ‘Antes de Nós’, longametraxe participada pola Televisión de Galicia e primeira sobre a figura de Castelao, chega aos cines este venres 23 de maio. ‘Antes de Nós’ é o segundo filme de ficción de Ángeles Huerta e narra a faciana máis persoal de Alfonso R. Castelao. A cinta descobre momentos únicos do icónico galeguista xunto á súa muller Virxinia Pereira, clave para entender a figura do político. 

Os cines Cantones da Coruña acolleron o mércores a preestrea da película nunha  presentación que contou coa presenza do equipo da película, a súa directora Ángeles Huerta, a produtora Zaza Ceballos, e o guionista Pepe Coira, así como personalidades do ámbito cultural, político e audiovisual. En representación da CRTVG, asistiu o director de Proxección Social, Xaime Arias. 
 
‘Antes de Nós’ é un drama histórico que explora a vida de Castelao antes de converterse no recoñecido home público, enfocándose en dous momentos clave: o seu traballo como médico durante a pandemia da gripe de 1918 e a súa viaxe á Bretaña en 1929, despois da morte do seu fillo.  Xoán Fórneas e Cris Iglesias encarnan a parella protagonista, que encabeza un elenco formado tamén por Nancho Novo, Aldám Santos Vilela, Manuel Cortés, Isabel Vallejo, Adrián Ríos, Miquel Insúa, Sergio Zearreta e Victoria Teijeiro, entre outros.
 
A rodaxe levouse a cabo en distintos escenarios de Galicia, como Rianxo, Compostela, A Estrada, Muros e Pontevedra. ‘Antes de Nós’ está producida por Retrincos AIE e conta coa participación da TVG e co apoio da Xunta de Galicia e do Instituto da Cinematografía e das Artes Audiovisuais (ICAA), e a colaboración das Deputacións de Pontevedra, Lugo e Ourense, así como do Concello de Pontevedra.

Santiago, 22.05.2025.-  A temporada toca a súa fin e o ‘Galicia en goles’ prepara unha programación intensa para esta xornada. O venres, ás oito e media do serán, Roberto Carlos Carballo conduce a primeira edición da fin de semana, con atención especial ao Palencia-Obradoiro de ascenso á Liga ACB e a celebración do Concello da Coruña polos 25 anos da Liga do Deportivo.

O sábado, desde as dúas e media da tarde, Xoán Galán pon en marcha un programa que podería prolongarse ata a madrugada se todo vai ben para o Celta de Vigo, que xoga ante o Xetafe acceder ás competicións europeas do curso 25-26. A derrota ante o Raio Vallecano en Balaídos complicou o pase, pero o equipo olívico segue dependendo de si e mesmo con repetir o que fagan os seus rivais directos chegaría para entrar na Europa League. A Radio Galega contará cun equipo de enviados especiais ao Coliseo, ademais de dispoñer un reporteiro que irá percorrendo os principais locais de Vigo onde se concentrarán centos de afeccionados. Si todo vai ben, o ‘Galicia en goles’ chegará ata a unha da mañá coa festa na praza de América.

Antes do decisivo Xetafe-Celta, a Primeira RFEF estará presente coa xornada unificada a partir das sete da tarde. O Lugo depende de si para asegurar a permanencia matemática, pero debe gañar en Amorebieta. Por si fose necesario, o Ourense podería axudarlle en Pamplona ante o filial de Osasuna. Mentres, o Arenteiro aínda perdendo en Tarragona é difícil que perda a categoría e o Celta Fortuna xoga en Zubieta ante a filial da Real Sociedad co único obxectivo de rematar na sexta praza.

Durante a tarde tamén haberá conexións coa festa das peñas do Deportivo en Riazor, o Albacete-Rácing de Ferrol de Segunda División, o torneo de fútbol base na Pobra e o campionato galego de ciclismo paralímpico desde Friol. Ademais haberá información cada quince minutos do polideportivo, co descendido Básquet Coruña visitando ao Murcia e con Noia, Burela e Parrulo Ferrol decidindo o futuro no fútbol sala nacional.

Xa o domingo, a edición matinal principia ás doce menos cuarto con cobertura ao Estradense-Noia de ascenso á Segunda RFEF, xunto á semifinal de balonmán Guardés-Elche e o remate do campionato galego de ciclismo paralímpico en Friol. A partir das dúas e media, a atención estará posta na Romareda, onde o Deportivo visita ao histórico Real Zaragoza que está pelexando pola permanencia e necesita a vitoria para non depender do Eldense. O Breogán-Gran Canaria, da Liga ACB de baloncesto, o Palencia-Obradoiro de ascenso e o enfrontamento de fútbol entre a Sarriana e o Vilalbés completan a oferta de retransmisións da tarde.

A partir das dez da noite, os especialistas de ‘Ao contraataque’ tomarán o mando para analizar todo o sucedido cos nosos equipos durante a fin de semana e ofrecer ademais as entrevistas cos principais protagonistas da fase de ascenso de Terceira á Segunda RFEF.

Audio da Radio Galega nas televisións

Esta xornada os partidos televisados que ofrecerán a narración da Radio Galega nas opcións de audio son os seguintes: Xetafe-Celta, Zaragoza-Deportivo e Breogán-Gran Canaria.
 

Santiago, 17.05.2025.- Os servizos dixitais da CRTVG son os máis consumidos de entre todos os entes autonómicos de España, e seguen a medrar. Só en Instagram, G24 chegou a 2 millóns de persoas no último mes, con case 40 millóns de reproducións nas últimas catro semanas. E en TikTok o último mes supuxo 2,3 millóns de impactos, con 15 millóns de reproducións dos seus vídeos.

Neste contexto, e no Día das Letras Galegas, nace un novo servizo informativo: G24play, pensado especialmente para o consumo en teléfonos móbiles de noticias en formato de vídeos moi curtos e directos. Esta nova canle ten a peculiaridade de que dota a Corporación de autonomía de manobra sobre os grandes operadores foráneos. G24Play é unha web e unha app propia, que non depende das normas nin dos algoritmos programados polas grandes corporacións tecnolóxicas mundiais de comunicación como X, TikTok ou Instagram.

G24Play é unha nova forma de informarse en galego sobre todo o que acontece en Galicia e no mundo de xeito moi sinxelo e moi doado de compartir nas redes e nas apps de mensaxería. A nova plataforma recollerá as principais noticias de G24, o portal informativo da canle pública galega, e adaptaraas a un formato vertical, con subtitulado e de curta duración.

G24play será accesible desde www.g24.gal ou directamente en G24play.gal, con app accesible de momento para Android, e que estará dispoñible en en iOS proximamente.

………………………………..

Arrastra e comparte, G24Play

Santiago, 13.05.2025.- A CRTVG celebrou este martes na Cidade da Cultura de Santiago a gala de entrega dos IV premios escolares DígochoEu, unha gran festa da lingua en que se coñeceron os centros educativos gañadores deste certame de vídeos en galego. Ao evento acudiron arredor de 500 escolares, os seus mestres e familiares, así como o conselleiro de Cultura, Lingua e Xuventude, José López Campos, o secretario xeral da Lingua, Valentín García Gómez; o director de Innovación da CRTVG, José Pereira, e Xaime Arias, director de Proxección Social. A gala foi presentada por Esther Estévez e polo reporteiro da TVG Óscar Cruz.

    A Televisión de Galicia emitirá a gala na súa programación especial o Día das Letras Galegas, o sábado 17 de maio (12:00 h) e tamén quedará dispoñible na plataforma dixital AGalega.gal.

    Na categoría de Educación Primaria, o premio de Ouro foi para o CEIP Sagrada Familia da Coruña, co vídeo ‘Climatoloxía’; o de Prata para o CEIP As Bizocas do Grove, que presentou o vídeo ‘Mariscos e peixes’, e o de Bronce para o CEIP San Xoán de Filgueira (Ferrol) por ‘Expresións ferrolás’. En Educación Secundaria resultaron gañadoras as propostas do CPI Plurilingüe O Cruce de Cerceda, coa peza ‘Goza coa túa lingua’, que levou o premio de Ouro; do IES Fontem Albei (A Fonsagrada), polo vídeo ‘Foliada’, que gañou o premio de Prata, e do IES Eduardo Pondal de Ponteceso, coa peza ‘Expresións da Costa da Morte’, gañadora do premio de Bronce.

    O xurado desta convocatoria 2024/2025 estivo formado por María Manuela Leis Cambeiro, asesora docente da secretaría de Política Lingüística da Xunta de Galicia, e por Carla Núñez e Marcos López, creadores de contido dixital baixo a marca Todo mal, que elixiron os gañadores pola calidade lingüística e expresividade dos vídeos, a súa orixinalidade e a innovación do contido. O concurso conta co patrocinio da Secretaría Xeral da Lingua e a colaboración de Gadis.

    DígochoEu é un proxecto da CRTVG que leva desde 2020 traballando a prol do galego, cun especial impacto nas xeracións máis novas e un gran éxito nas redes sociais, nas que se publican os vídeos e se explican dúbidas sobre o uso correcto da lingua. A comunidade construída arredor do ‘DígochoEu’ tivo, desde os seus comenzos, unha acollida sen precedentes na comunidade educativa.

Santiago, 09.05.2025.-  A CRTVG volve ser altofalante da celebración do Día das Letras Galegas cunha programación especial arredor da poesía popular oral e das figuras homenaxeadas este ano, as cantareiras Adolfina e Rosa Casás Rama, Eva Castiñeira e as Pandeireteiras de Mens -Manuela Lema Villar e Prudencia e Asunción Garrido Ameijende-. A TVG e a G2 achegarán, a través de documentais, entrevistas e pezas recuperadas do Arquivo sonoro e audiovisual, a extraordinaria contribución do cancioneiro popular á cultura galega.

Os medios públicos farán un completo seguimento informativo dos actos conmemorativos do día 17. Os informativos e programas da CRTVG garantirán a cobertura completa da actualidade. O magazine ‘Galicia por diante’ da Radio Galega modificará a súa estrutura habitual e emitirase en colaboración co ‘Diario cultural’, cubrindo en directo os actos institucionais, como o pleno extraordinario da RAG e o acto oficial da Xunta de Galicia. Tamén contará con entrevistas a destacadas figuras da cultura galega.

O cultural ‘ZigZag’ emitirase no Día das Letras Galega na primeira canle da TVG. O equipo de cultura elaborou un monográfico especial sobre as cantareiras, recuperando a súa obra e vida no seu contexto histórico e cultural. O espazo contará coa participación de músicos, familiares, amigos, académicos e estudosos do cancioneiro popular, e abordará a pegada da poesía popular oral na xente máis moza e nas novas correntes musicais.

Para multiplicar a difusión, as canles dixitais e as redes sociais da CRTVG faranse eco da programación e da actualidade da semana. E a efeméride será, como cada ano, protagonista a nivel institucional dunha das #AcciónsG anuais dentro da Responsabilidade Social Corporativa da CRTVG.

‘Pandeireta-tok’, unha peza sobre a música tradicional vista polos mozos e os seus novos medios de difusión, así como a serie documental ‘Os nomes da nosa terra’ (A Illa de Arousa, A Serra do Cando, Rodeiro, Baiona) son algúns dos contidos previstos na TVG, xunto coa produción da Real Academia Galega ‘Se canto é porque quero’.

A voz e a música das homenaxeadas e do cancioneiro popular galego resoarán na Radio Galega grazas aos fondos do Arquivo Sonoro da CRTVG e ás colaboracións con institucións culturais. O espazo ‘Diario cultural’, nas súas edicións de mañá e tarde, emitirá entrevistas e reportaxes sobre a pegada da poesía popular e a contribución da música tradicional á preservación do patrimonio cultural de Galicia. A programación afondará no perfil das homenaxeadas, no fenómeno das pandeireteiras en toda Galicia e na evolución das coplas ata as novas manifestacións artísticas actuais. Ademais, emitirase un ‘Diario cultural’ especial, o sábado 17 de maio.

AGalega.gal estreará o venres 16 a canle específica ‘Letras Galegas 2025’ que estará dispoñible durante un mes e que reunirá, entre outros contidos, o documental ‘Pandeireita-tok’; as series ‘Se canto é porque quero’ e ‘Non canto por cantare’; o documental ‘Dorothè na vila’; así como o Especial das Letras de ‘Zigzag’ e o Concerto da Letras do CCG. Sumaranse tamén o novo espazo dixital sobre lingua ‘Bótalle azucre’ así como os máis de 200 capítulos de ‘Alalá’.

Así mesmo, quedará tamén dispoñible a gala de entrega dos Premios Escolares DígochoEu 2025, que se celebrará o martes 13 de maio na Cidade da Cultura, e que tamén emitirá a TVG o sábado 17. Pola súa banda, a plataforma de audio AGalegaAudio.gal incluirá tamén unha sección especial dedicada ás Letras Galegas.

AGalega.gal tamén estreará a miniserie documental ‘Canta, miña compañeira’, que explora a evolución da música popular a través das mulleres que a mantiveron viva, celebrando o seu rexurdir nos torreiros do século XXI. Esta serie, dirixida especialmente a un público mozo de entre 15 e 35 anos, conecta o pasado co presente e serve como unha guía para redescubrir a nosa identidade musical. 

‘O corno’, ‘O corpo aberto’ e ‘Eroski Paraíso’, os sábados á noite

As noites dos sábados 10 e 17 de maio, son para o cine galego. TVG programa no prime time ‘O corno’ gañadora da Cuncha de Ouro en San Sebastián no 2023, e ‘O corpo aberto’, a cinta triunfadora nos Premios Mestre Mateo 2023. E a G2, o mesmo sábado 17, emitirá ‘Eroski Paraíso’. ‘O home e o can’, ‘Lúa vermella’ ou ‘Unicorn wars’ son outros títulos que se poderán ver ao longo da semana.

Concerto das Letras do Consello da Cultura Galega

A programación especial inclúe a emisión do ‘Concerto das Letras’ do Consello da Cultura Galega. A G2 vai emitilo o propio día 17, no prime time, e tamén quedará dispoñible na plataforma AGalega.gal. O concerto estará a cargo de Do Bertau, unha formación efémera coordinada por Richi Casás e creada expresamente para esta ocasión. Integrada por 11 artistas de distintos eidos musicais, Do Bertau interpretará unha ducia de pezas dos cancioneiros para ofrecer, cunha envoltura de jazz, muñeiras, comparsas, xotas, pasodobres e outros tipos de cantos tradicionais de diferentes zonas de Galicia.

Documentais e música tradicional, na G2

A celebración das Letras Galegas vertebra a programación da G2 xa desde o luns 12 coa estrea dos documentais ‘Dorothé na vila’ que narra a experiencia de dous mozos que inician unha viaxe tras os pasos da musicóloga suíza Dorothé Schubarth para descubrir as voces que ela gravou hai 40 anos en Galicia; e ‘Non canto por cantare’ (estrea no prime time do martes 13) serie que explora en seis episodios a evolución da música popular galega a través das mulleres que a mantiveron viva e celebra o rexurdir do folclore nos torreiros do século XXI, conectando o pasado co presente nunha guía para redescubrir a nosa identidade musical.

A ‘noite da música’ incluirá tamén varios capítulos especiais do programa de musica tradicional galega ‘Alalá’ que salientan o labor das cantareiras na transmisión da lírica popular, tal como recoñece a RAG dedicándolles o Día das Letras Galegas deste ano. 

Santiago, 08.05.2025.- Faltan catro xornadas para que remate a Primeira División de fútbol. O Celta afronta o último mes do campionato clasificado na sétima posición, que conduce á Europa League. As contas do equipo que prepara Claudio Giráldez pasan por gañar os dous partidos que restan en Balaídos e se cadra sumar algún punto nos desprazamentos a San Sebastián e Xetafe.

Este sábado, desde as 15:45 h, Gustavo Varela, Tomás Alonso e Roberto Lago contarán o encontro que enfronta ao Celta co Sevilla no estadio vigués. Os espectadores poderán seguir a emisión a través da primeira canle da Televisión de Galicia e da plataforma AGalega.gal, coa previa máis completa e os noventa minutos de xogo.

No descanso, o Xabarín da Televisión de Galicia saltará o céspede de Balaídos para celebrar os 40 anos da TVG, que se cumpren neste 2025, e os 40 anos de retransmisións e apoio ao equipo celeste. En canto remate o partido comezará un programa especial conducido por Óscar Benito, para ofrecer as declaracións dos principais protagonistas e as conferencias de prensa dos dous adestradores.

Máis deporte na fin de semana

Durante a fin de semana o deporte tamén estará presente na programación da segunda canle, a G2, ademais da plataforma AGalega.gal. O sábado, a partir das cinco da tarde, o pavillón municipal do Porriño acolle a ida da final da European Cup de balonmán entre o equipo galego e o Valur de Islandia.

Ao remate chegará o fútbol da Primeira RFEF, coa visita do Club Deportivo Lugo ao Nástic de Tarragona no Nou Estadi. A goleada encaixada ante o filial do Barcelona provocou o cesamento de Toni Seligrat como adestrador, coa chegada ao banco de Álex Ortiz procedente do filial da Terceira RFEF.

Xa o domingo, a mañá estará protagonizada polo fútbol da Terceira Federación, co remate da liga regular. A Federación unificou o horario dos nove partidos, programados para as 12:00 horas. As citas chave son o Arousa-Alondras e Betanzos-Noia, no que está en xogo a quinta praza que conduce á promoción de ascenso á Segunda RFEF. A partir das 14:00 h, o motocrós tomará o mando desde o circuíto de Lugo, onde se disputa unha nova proba do Mundial MXGP, coa segunda manga prevista para as cinco da tarde. A xornada deportiva rematará o domingo ás 19:00 h desde o estadio de Riazor, onde o Fabril Deportivo inicia a fase de ascenso á Primeira RFEF recibindo ao UCAM Murcia.

‘En xogo’

O domingo pola noite, contra as 22:25 h, o equipo deportivo da Televisión de Galicia resume na G2 todo sucedido na xornada futbolística cunha nova edición do programa En Xogo. Os espectadores poderán ver amplos resumes dos partidos Celta-Sevilla, Spórting de Xixón-Deportivo e Tenerife-Rácing de Ferrol, ademais do clásico disputado en Montjuic entre o Barcelona e o Real Madrid. Os goles da Primeira e Terceira RFEF, xunto á fase de ascenso desde a Segunda RFEF, completarán a oferta nocturna.

Deportes nos telexornais

De luns a domingo, a TVG dedica amplos espazos de información deportiva nos distintos telexornais e no matinal ‘Bos días’ coa última hora dos equipos galegos que participan nas competicións profesionais de fútbol e baloncesto. Durante os sete días da semana os medios públicos galegos tamén informan do mundo do deporte na plataforma G24.gal e na conta de X @EnXogo_tvG2.

Santiago, 08.05.2025.-     A semana deportiva na Radio Galega e AGalegaAudio.Gal comeza este xoves. A partir das 20:30 h., Roberto Carlos Carballo conduce a retransmisión do partido da Liga ACB de baloncesto entre o Basquet Coruña e Barcelona, desde o Coliseum. Pase o que pase, o equipo herculino evitará o descenso matemático á Primeira Federación e se fose quen de dar a sorpresa mantería mínimas opcións de permanencia. O equipo de Epi confía en repetir a fazaña da primeira xornada, cando derrotara o Real Madrid cunha xogada de catro puntos nos segundos finais.

O venres, tamén desde as 20:30 h, o baloncesto volverá ser protagonista, desta volta coa última xornada da competición regular na Primeira Federación. O Obradoiro xoga en Burgos ante o Tizona co obxectivo de acadar o triunfo e asegurar o factor cancha nos cuartos de final polo ascenso á ACB ante o Palencia. Mentres, o Ourense viaxa a San Sebastián para medirse ao Gipuzkoa coa ilusión de gañar e meterse nos play off.

Xa o sábado, a edición informativa das 14:20 h emitirase desde o circuíto de Lugo, na previa da disputa do Mundial de motocrós MXGP.

Ás 15:00 h, Xoán Galán dirixirá as retransmisións dos partidos Celta-Sevilla e Sporting de Xixón-Deportivo, que coinciden en franxa horaria. Para o Celta, o encontro é decisivo para seguir mantendo a sétima praza que conduce á Europa League. O rival chamou a Joaquín Caparrós para escapar da zona perigosa e tras dúas xornadas aínda non foi quen de acomodarse na zona tranquila. Pola súa banda, o Deportivo celebrará no Molinón a permanencia matemática na Segunda División ante un rival que logo de cesar ao galego Rubén Albés mellorou en resultados e semella estar xa fóra de perigo. Así e todo necesita polo menos tres puntos máis para certificar a continuidade tras a derrota do pasado luns en Castelló.

O fútbol de Primeira RFEF completará a sesión da tarde, coa visita do Lugo a Tarragona para medirse ao Nástic e o enfrontamento entre o Tarazona e o Ourense C. F.

O domingo, a sesión matinal comeza ás 11:45 horas con atención especial ao Deportivo-Sevilla, no que está en xogo para o cadro coruñés a opción de conquistar a permanencia matemática na Primeira División feminina. As outras citas son os encontros da Primeira RFEF Amorebieta-Celta Fortuna e Osasuna B-Arenteiro, xunto ao final con horario unificado da Terceira RFEF.

O baloncesto será outro dos argumentos, coa visita do Basquet Coruña ao Bilbao Basquet na Liga ACB. A partir das 15:00 h, o interese estará no Pazo de Lugo, onde o Breogán recibe ao Real Madrid. Ademais haberá clásico na Primeira en Montjuic, mentres na Segunda o Racing de Ferrol, xa descendido, visita a outro equipo que está ao bordo da caída, o Tenerife.

Audio nas televisións

Esta xornada, os espectadores poderán escoitar as retransmisións da Radio Galega nas opcións de audio dos seus operadores de televisión. Os partidos seleccionados son Celta-Sevilla, Sporting de Xixón-Deportivo, Basquet Coruña-Barcelona e Breogán-Real Madrid.

#GaliciaEnXogo

Este sábado o motor terá unha ampla presenza no proxecto que leva o cancelo de #GaliciaEnXogo. Ás once da noite Rodrigo Pérez falará cos principais protagonistas da proba do mundial de motocrós programada para o domingo no circuíto de Lugo. O espazo tamén recollerá os resultados do Rally da Mariña, puntuable para o campionato galego. Ás 23:30 horas Toni López actualizará, como cada sábado, a actividade dos galegos que preparan os Xogos Olímpicos de 2028.

Santiago, 07.05.2025.- Coincidindo co inicio do conclave no que os cardeais reunidos na Capela Sixtina escollerán o novo Papa —un proceso marcado polo segredo, os símbolos e a transcendencia histórica—, a CRTVG despregará un dispositivo especial en televisión, radio e plataformas dixitais para informar en tempo real sobre este acontecemento de alcance global.

A cobertura incluirá conexións en directo desde o Vaticano, entrevistas con expertos, análise de contexto e voces representativas da Igrexa e do mundo académico, co obxectivo de achegar á audiencia galega as claves dunha elección que marcará o futuro da Igrexa católica.

No momento en que haxa fumata branca no Vaticano, a Televisión de Galicia ofrecerá un Especial que contará coa participación de Alberto Varela, xefe de Informativos da Radio Galega. Entre os convidados confirmados figuran o xornalista vaticanista Juan Vicente Boo, o Arcebispo Emérito de Santiago Julián Barrio, o Arcebispo de Santiago Francisco José Prieto, o Arcebispo de Mérida-Badaxoz José Rodríguez Carballo e o bispo de Ourense Leonardo Lemos. Tamén intervirán o teólogo Pedro Castelao (Universidade de Comillas), a relixiosa Silvia Rozas, secretaria xeral da CONFER e o diplomático vaticano Francisco Froján Madero. O enviado especial da CRTVG, Marcos Sueiro, informará en directo desde Roma, onde se prevén entrevistas con representantes eclesiásticos destacados.

A Radio Galega ofrecerá o especial ‘Habemus Papam’ desde o Estudio Multimedia da emisora, coa xornalista Cristina García narrando o resultado do conclave desde o Vaticano. Participarán como convidados neste especial Milagros Otero, Silvia Rozas, Pedro Castelao, o xurista Celso Alcaina, o analista Roberto Blanco Valdés, representantes do episcopado galego e docentes como Francisco Buide e Luis Rodríguez Patiño. Tamén está prevista unha intervención do colexio La Merced de Sarria, actualmente de visita en Roma.​​

Toda a cobertura poderá seguirse tamén a través da plataforma dixital G24.gal, que ofrecerá actualizacións constantes, vídeos, análises e os momentos clave do conclave e da eventual fumata branca que anunciará o novo pontífice.

Santiago, 02.05.2025.-    Coa chegada este venres a Xabarin.gal da serie de animación ‘Moby Dick e o segredo de Mu’, comeza un mes de maio cheo de estreas na plataforma dixital infantil da CRTVG. Esta ficción ten como protagonista a Romy, un valente rapaz de 12 anos que debe viaxar arredor do mundo na busca de 24 pedras sagradas ocultas por unha civilización perdida para que lle sexa revelado ‘o segredo de Mu’. Hoxe poranse a disposición 13 capítulos.

O seguinte venres, 9 de maio, Xabarin.gal incorporará ao seu catálogo ‘Os Bolechas. As miñas primeiras letras’, en que a familia creada por Pepe Carreiro repasa algúns dos nomes máis grandes da nosa literatura para ensinarllos á rapazada de xeito máis divertido.

O 16 de maio, véspera do Día das Letras Galegas, estrearase a segunda temporada da serie de animación galega ‘Bechos’. Nela, o xabaril Xurxo, a raposa Catuxa, a vaca Margarida e a toupa Xiana quedan no parque para xogar todos os días. Coas súas historias, os espectadores máis pequenos aprenden o respecto pola natureza, a necesidade de reciclar e o valor da amizade.

Unha semana despois, o día 23, os cativos e cativas poderán gozar da serie de animación ‘Can cheirento’. O seu protagonista vive nun caldeiro do lixo, cheira a sardiñas e está cheo de pulgas. Ademais, é bastante parvo, pero ten un corazón que non lle cabe no peito e é puro optimismo e alegría. Vivirá as súas aventuras por París adiante. A serie está baseada nos libros de Colas Gutman, que xa venderon máis de dous millóns de copias en Francia e están traducidos a máis de 20 idiomas.

As estreas de maio en Xabarin.gal completaranse o venres 30 coa posta á disposición de novos capítulos de ‘Glumpers’, uns amigos que viven xuntos e cunhas personalidades que chocan constantemente, convertendo a súa casa nunha tremenda fonte de desastres que ocorren en cada episodio.

Santiago, 30.04.2025.-  A CRTVG ofrecerá a 15ª edición do Concerto das Letras Galegas, unha homenaxe ao canto tradicional organizada polo Consello da Cultura Galega (CCG), que terá lugar o 16 de maio en Carballo. O evento poderá seguirse en directo a través da web do CCG e emitirase o sábado 17, Día das Letras Galegas, na segunda canle da TVG. Ademais, quedará dispoñible na plataforma dixital AGalega.gal, reforzando así a oferta especial de contidos culturais da CRTVG nesta data sinalada.

Este concerto, con entrada libre, celebrarase no Pazo da Cultura de Carballo e destaca por poñer en valor a riqueza musical da comarca de Bergantiños a través dunha selección de cantos tradicionais galegos presentados cunha nova envolvente sonora. A proposta artística desta edición estará a cargo de Do Bertau, unha formación creada especificamente para esta ocasión, coordinada por Richi Casás e composta por 11 músicos e músicas de diversos ámbitos, cunha posta en escena contemporánea e inspirada na tradición.

A presidenta do CCG, Rosario Álvarez, xunto co alcalde da localidade, Evencio Ferrero, presentaron en rolda de prensa o programa desta cita, que fai un percorrido pola xeografía galega a través das melodías tradicionais cunha posta en escena contemporánea. Na rolda tamén participaron o director do Arquivo Sonoro de Galicia, Alejo Amoedo; a xefa de Comunicación Corporativa da CRTVG, Marta Fernández, e a concelleira de Cultura de Carballo, Maruxa Suárez.

“Sempre concibimos o concerto como un proxecto colaborativo e este ano puxemos aínda máis o acento no colectivo xa que, grazas á mestría de Richi Casás, créase unha banda efémera de 11 artistas que lle dá impulso a esta proposta” explicou na rolda Rosario Álvarez. O director do Arquivo Sonoro de Galicia destacou que, o Concerto das Letras Galegas “escolma nesta ocasión arredor dunha ducia de pezas do amplo legado recollido nos cancioneiros para ofrecer, cunha envoltura de jazz a cargo de Do Bertau, muiñeiras, comparsas, xotas, pasodobres e outros tipos de cantos tradicionais de diferentes zonas de Galicia”. Pola súa banda, Evencio Ferrero agradeceu na rolda a elección de Carballo para este concerto que “nos permite honrar á nosa tradición desde a comarca de Bergantiños, que ten unha fonda raigame de música tradicional con moitas persoas que serviron de fonte na que beberon os novos valores da música tradicional galega”. O concerto poderá seguirse en directo a través da web do CCG no día do concerto e “na segunda canle da TVG no marco da programación especial do Día das Letras Galegas e despois quedará a disposición da cidadanía na plataforma dixital AGalega.gal” explicou Marta Fernández.

Durante a presentación, a xefa de Comunicación Corporativa da CRTVG, subliñou tamén que “a CRTVG volve ser altofalante dunha celebración das Letras Galegas neste ano no que as protagonistas son a voz e a música das cantareiras e pandereteiras, que soarán na TVG, a Radio Galega e as plataformas AGalega.gal e AGalegaAudio.gal grazas aos fondos do Arquivo Sonoro e a colaboracións institucionais como a asinada co Consello da Cultura Galega”.

O programa

O Concerto das Letras Galegas arranca coa Comparsa de Mens, en Ordes, recuperada a través das gravacións clásicas feitas primeiro por Alan Lomax cando chegou a Galicia nos anos 50 enviado pola discográfica Columbia e, dúas décadas despois, pola musicóloga suíza Dorothé Schubarth. Séguelle unha xota de Maruxa das Cortellas, unha das máis sobranceiras informantes en Galicia do toque de pandeiro. No programa destaca tamén o Canto de Nadal de Rosa e Adolfina Casás, un dos poucos cantos deste tipo que se conservan en galego. Tamén se escoitaran as Mulleres de Gharghamala, un grupo de cantadoras e tocadoras de Mondariz que seguen mantendo viva a chama da tradición. Do sur da provincia de Pontevedra pasarase ao sur de Ourense para escoitar o canto de canteiros de Faramontaos, que nesta ocasión soará na voz de Tanea. Explica Richi Casás que “os canteiros en todas as culturas acompañaban o seu traballo con cantares rítmicos para acompasar o seu esforzo á hora de mover grandes pedras”. Na recta final do concerto escoitaranse dúas pezas de Cervantes, cantadas a capela nas voces das tres integrantes de Bouba Pandeireteiras sen o acompañamento da banda. Poñen o ramo ao concerto dúas pezas de Santa Mariña, unha xota e unha muiñeira recollidas por Dorothé Schubarth ás veciñas camariñás. 

O concerto insírese no marco dun acordo asinado hoxe entre o CCG e o Concello de Carballo. Pola súa parte, a CRTVG, que tamén asinou este mes un convenio de colaboración co Consello da Cultura Galega, súmase a esta iniciativa que abre a programación do Día das Letras Galegas, dando difusión á proposta tanto na súa grella televisiva como nas súas plataformas dixitais. As entradas de balde para o concerto estarán á disposición do público na billeteira do Concello (https://billeteira.carballo.gal/) a partir do xoves, 1 de maio.