A Televisión de Galicia retransmite este domingo, en directo desde Vigo, a procesión do Cristo da Vitoria - CSAG
A Televisión de Galicia retransmite este domingo, en directo desde Vigo, a procesión do Cristo da Vitoria
O xornalista Moncho Lemos realizará, a partir das 19:30 h, os comentarios deste evento multitudinario, considerado como un dos grandes fitos da Semana Grande da Cidade Olívica
Santiago, 31.07.2025.- A Televisión de Galicia retransmite este domingo en directo desde Vigo, a partir das 19:30 h, a procesión do Cristo da Vitoria, un evento multitudinario considerado como un dos grandes fitos da Semana Grande da Cidade Olívica, que será comentado polo xornalista da TVG Moncho Lemos.
A procesión, que sairá da concatedral de Santa María, percorrerá as principais rúas de Vigo e rematará na Porta do Sol. Benjamín Estévez de Cominges, natural de Vigo e actual secretario de Economía do Vaticano, un dos postos clave na xestión financeira da Santa Sé, será o encargado de pronunciar este ano o pregón do Cristo da Vitoria. O estandarte portarao o xornalista Fernando Franco.
Ademais, participarán neste evento os grupos de baile da Agrupación de Centros Culturais e Deportivos de Vigo e a banda de música Unión Musical de Coruxo. O coro ACOPAVI cantaralle ao Cristo na Porta do Sol ao finalizar a procesión.
A TVG ofrecerá ata as 21:00 h o percorrido da talla, así como a agardada afluencia multitudinaria que concita en Vigo este acto relixioso, tradicionalmente relacionado coa vitoria sobre as tropas napoleónicas que invadiron a cidade en 1809.