AGalega.gal estrea o mércores ‘Amor con interese’, un novo formato dixital que mestura citas e intelixencia artificial

Santiago, 13.10.2026.-    AGalega.gal incorpora esta semana novas propostas de entretemento, divulgación e cine, entre as que destaca a estrea de ‘Amor con interese’, un novo formato dixital que pon a intelixencia artificial ao servizo das citas amorosas. A plataforma da Corporación de Servizos Audiovisuais de Galicia (CSAG) ofrecerá tamén novas entregas de ‘BenLidos’, ‘Sexo con Senso’ e ‘Bótalle azucre’, así como unha selección de películas de distintos xéneros.

O mércores 14 chega ‘Amor con interese’, un programa de entretemento seleccionado na última convocatoria de contidos dixitais da CSAG. En cada entrega, o influencer Salseología recibe unha persoa solteira que busca parella, sen saber que entre os seus pretendentes se agocha un cibercarracho: alguén que segue un guión creado mediante intelixencia artificial. No primeiro capítulo, o tiktoker Miguel García buscará o amor sen sospeitar que participará nunha cita dobre nin coñecer a verdadeira identidade dun dos participantes. O formato terá unha nova entrega cada mércores durante catro semanas.

Novas entregas de ‘BenLidos’, ‘Sexo con Senso’ e ‘Bótalle azucre’

A divulgación tamén terá o seu espazo na programación semanal. O xoves 15, ‘BenLidos’, presentado por Alba Mancebo, dedicará un novo capítulo a ‘Memorias dun neno labrego’, a obra de Xosé Neira Vilas publicada en 1961 que Iria Aldegunde adapta por primeira vez á banda deseñada. A xornada completarase cun novo episodio de ‘Bótalle azucre’. O venres 16 será a quenda de ‘Sexo con Senso’, o espazo de divulgación sobre sexualidade presentado pola matrona Lidia Lestegás, que nesta entrega abordará o erotismo e afondará no papel do desexo, a imaxinación e o xogo no pracer.

A oferta cinematográfica comezará o martes 13 con ‘Fátima’, película inspirada nas aparicións marianas que narra a historia de Lucía, Jacinta e Francisco, os tres nenos que afirmaron que viran a Virxe María e que tiveron que afrontar o escepticismo dunha parte da sociedade.

‘Mentes marabillosas’, unha historia de amizade entre Louis, un empresario funerario, e Igor, un mozo con discapacidade apaixonado pola filosofía, estrearase o xoves 15. A viaxe que emprenden xuntos levaraos a cuestionar os seus prexuízos e a mirar a vida desde unha perspectiva diferente.

Ao día seguinte, o venres 16, chegará ‘A sentenza’, un drama histórico protagonizado por Victor Dessauer, un empresario xudeu vienés que, tras perder case toda a súa familia a mans dos nazis, intenta levar ante a xustiza o responsable da matanza. Na década de 1960, descubrirá as dificultades de afrontar un sistema xudicial e unha sociedade que aínda non romperan co seu pasado.

Por último, o sábado 17 incorporarase ‘Unha volta con Madeleine’. A película segue a Madeleine, unha muller maior que debe abandonar a súa casa para ingresar nunha residencia e que lle pide a Charles, o taxista que a traslada, que percorra con ela distintos lugares de París que marcaron a súa vida. A viaxe converterase nun encontro de confidencias e lembranzas que acabará transformando os dous protagonistas.

Estes títulos estarán dispoñibles durante 30 días, agás ‘Unha volta con Madeleine’, que poderá verse ata o 20 de outubro.