As traiñeiras e o motocrós conforman a oferta deportiva dos medios públicos galegos para a primeira fin de semana de agosto - CSAG
As traiñeiras e o motocrós conforman a oferta deportiva dos medios públicos galegos para a primeira fin de semana de agosto
A G2 e a plataforma AGalega.gal ofrecerán en directo as Bandeiras Txingudiko, Hondarribia Mapfre, Euskotren e El Correo-Kutxabank
Na sobremesa e na tarde do domingo será protagonista o MXGP de Flanders, en Bélxica, 15ª proba do Mundial
Santiago, 01.08.2025.- O remo e o motor serán as disciplinas deportivas das que poderán gozar esta primeira fin de semana de agosto os espectadores da G2 e os usuarios da plataforma AGalega.gal.
A atención do mundo do remo estará centrada este sábado na localidade guipuscoana de Hondarribia, onde se disputarán a Bandeira Txingudiko (17:20 h), correspondente á Liga Euskotren, e a Bandeira Hondarribia Mapfre (18:10 h), da Liga Eusko Label, que serán ofrecidas en directo polos medios públicos galegos.
O domingo, a Liga ACT trasladarase ao municipio biscaíño de Lekeitio. Alí comezará ás 11:20 h a Bandeira Euskotren, coa participación das embarcacións femininas, e a continuación, ás 12:15 h, retransmitirase a regata masculina, a Bandeira El Correo-Kutxabank.
A partir das 14:00 h tomará a remuda o Mundial de Motocrós. A esa hora ofrecerase a primeira manga do MXGP de Flanders, en Bélxica, a 15ª proba do campionato. A segunda manga disputarase ás 17:00 h. As dunas ondulantes e fondas do circuíto Stedelijk Motocrossterrein de Lommer, un dos máis esixentes do mundo do motocrós, recibirán os participantes, que chegan coa distancia máis pequena do que levamos de campionato entre os dous primeiros clasificados. E é que o portador da placa vermella, Romain Febvre, ten só dez puntos de vantaxe sobre o belga Lucas Coenen.