Dobre entrega de 'Galicia bonita' esta noite con reformas en Salceda de Caselas e Cuntis

Santiago, 26.11.2025.-    ‘Galicia bonita’ (22:45 h) volve este mércores á TVG cunha dobre entrega, que levará o equipo do programa ata Salceda de Caselas e Cuntis. Na primeira obra, en Salceda, unha seguidora incondicional do traballo de Rosa Facal recibe o equipo coa ilusión de transformar a súa vivenda e un pendello para a grella. Porén, a súa teima por defender a arquitecta e por poñer límites ás propostas de Litos provocará certas tensións no proceso dunha reforma que promete non deixar indiferente a ninguén.

A continuación, o programa desprázase ata a comarca de Caldas, concretamente a Vilameán, na parroquia de Estacas (Cuntis). Nesta segunda entrega, Mónica busca recuperar e arranxar a casa familiar na que naceu, coa intención de poder vivir alí a pesar de traballar fóra. Pero a tarefa non será doada: a desconfianza inicial da propietaria cara ao equipo de ‘Galicia bonita’ condicionará o desenvolvemento do proxecto. Nin sequera os consellos da súa irmá Mari Carmen logran que Mónica aprobe con tranquilidade as actuacións previstas, freada polos seus medos ao arrepentimento.