FORTA elixe a Paco Aura, director xeral de Á Punt, como presidente - CSAG
FORTA elixe a Paco Aura, director xeral de Á Punt, como presidente
Asume o cargo co obxectivo de fortalecer a cooperación e a eficiencia entre as entidades públicas de radiodifusión
Madrid, 09.07.2026.- A Federación de Organismos de Radio e Televisión Autonómicos (FORTA), da que forma parte a CSAG, elixiu o director xeral de À Punt, Paco Aura, como novo presidente da entidade para os vindeiros seis meses. Aura ocupará a presidencia ata decembro de 2026, de acordo co sistema de rotación establecido nos estatutos da FORTA.
O novo presidente sucede a José Antonio Sánchez Domínguez, director xeral de Radio Televisión Madrid (RTVM), quen centrou o seu mandato en consolidar as emisoras autonómicas como referentes na cobertura informativa local e no servizo público. O seu labor conclúe co agradecemento e o apoio unánime da Asemblea Xeral da FORTA á súa xestión.
Tras a súa elección, Paco Aura afirmou que asume a presidencia con “entusiasmo e sentido da responsabilidade para levar a cabo con éxito os proxectos compartidos polas cadeas autonómicas, ao tempo que se optimiza o uso dos recursos técnicos e humanos dispoñibles”. “As emisoras autonómicas son fundamentais para a cohesión social en España”, salientou.
En relación con À Punt, o novo presidente da FORTA mostrouse “satisfeito porque a posta en marcha de estratexias dirixidas a aumentar as cifras de audiencia -e, con iso, o impacto mediático do servizo público en toda a Comunidade Valenciana- está a dar resultados”.
Paco Aura exerce como director xeral de À Punt desde febreiro de 2025. Conta cunha ampla traxectoria no sector audiovisual, xa que, anteriormente, foi director de operacións en TRECE TV (2013-2025) e director xeral de Televisión Popular del Mediterráneo (2007-2013). Ademais, ocupou cargos en Canal 9, onde foi xefe de produción e produtor de informativos, ademais de enviado especial para diversos acontecementos internacionais.