Osasuna B-C. D. Lugo, este sábado pola tarde na segunda canle da TVG - CSAG
Osasuna B-C. D. Lugo, este sábado pola tarde na segunda canle da TVG
O domingo, os espectadores poderán ver o encontro da Primeira División feminina Real Sociedade-Deportivo e, exclusivamente a través de AGalega.gal, o partido de Segunda RFEF Sarriana-Astorga
Santiago, 12.12.2025.- O fútbol protagoniza a programación deportiva desta fin de semana na segunda canle da Televisión de Galicia e na plataforma AGalega.gal.
O sábado, a partir das 16:15 h, a cidade deportiva de Tajonar acollerá a visita do Club Deportivo Lugo ao filial do Club Atlético Osasuna. O equipo que prepara Iago Iglesias viaxa a Pamplona logo de empatar ante o líder, o Tenerife, no Anxo Carro. É tal a igualdade na clasificación que os dous equipos están separados por dous puntos, cos navarros situados en zona de descenso á Segunda RFEF. Este encontro poderase seguir só a través da segunda canle da TVG.
O domingo, ás 12:00 h, a Primeira División de fútbol feminino terá cobertura a través da G2 e da plataforma AGalega.gal co enfrontamento entre a Real Sociedade e o Deportivo. As coruñesas desprázanse a San Sebastián coa tranquilidade de deixar o descenso a oito puntos logo da vitoria o pasado domingo ante o Granada en Riazor. As donostiarras, pola súa parte, teñen como obxectivo disputarlle o segundo posto da clasificación ao Real Madrid. A Real e o Dépor volverán coincidir a semana que vén, desta volta en Riazor na eliminatoria da Copa da Raíña e de novo coa presenza das cámaras da Televisión de Galicia.
Xa na tarde do domingo, a Segunda RFEF estará presente só a través da plataforma AGalega.gal coa retransmisión desde a Ribela do partido entre a Sarriana e o Atlético Astorga. Os galegos atravesan por un excelente momento, ocupando a zona media da táboa. Mentres, o rival desta xornada está obrigado a puntuar para non caer na zona de descenso á Terceira RFEF.
En Xogo
O domingo pola noite, contra as 00:00 h, o programa ‘En Xogo’ resumirá o máis destacado do sucedido durante a fin de semana. Esta xornada atenderá de xeito especial os partidos Celta-Athlétic de Bilbao, da Primeira División, e Deportivo-Real Sociedade, da Segunda. Ademais, analizará todo o que suceda nas ligas da Federación e deterase nas xogadas polémicas dentro da sección do VAR.